خلافت و ملوکیت

اس خلافت کا جو تصور قرآن میں دیا گیا ہے وہ یہ ہے کہ زمین میں انسان کو جو قدرتیں بھی حاصل ہیں خدا کی عطا اور بخشش سے حاصل ہیں۔ خدا نے خود انسان کو اس حیثیت میں رکھا ہے کہ وہ اس کی بخشی ہوئی طاقتوں کو اس کے دیے ہوئے اختیار سے اس کی زمین میں استعمال کرے۔ اس لیے انسان یہاں خود مختار مالک نہیں بلکہ اصل مالک کا خلیفہ ہے:

<<وَ اِذۡ قَالَ رَبُّكَ لِلۡمَلٰٓئِكَةِ اِنِّىۡ جَاعِلٌ فِى الۡاَرۡضِ خَلِيۡفَةًؕ>> (البقره : ٣٠)

”اور یاد کرو جب کہ تمھارے رب نے ملائکہ سے کہا کہ میں زمین میں ایک خلیفہ بنانے والا ہوں۔“

<<وَ لَقَدۡ مَكَّنّٰكُمۡ فِى الۡاَرۡضِ وَ جَعَلۡنَا لَكُمۡ فِيۡهَا مَعَايِشَؕ>> (الاعراف: ۱۰)

”(اے انسانو!) ہم نے تمھیں زمین میں اختیارات کے ساتھ بسایا اور تمھارے لیے اس میں سامان زیست فراہم کیے۔“

<<اَلَمۡ تَرَ اَنَّ اللّٰهَ سَخَّرَ لَكُمۡ مَّا فِى الۡاَرۡضِ>> (الحج: ۶۵)

”کیا نہیں دیکھتے ہو کہ اللہ نے تمھارے لیے وہ سب کچھ مسخر کر دیا جو زمین میں ہے۔“

ہر وہ قوم جسے زمین کے کسی حصے میں اقتدار حاصل ہوتا ہے، دراصل وہاں خدا کی خلیفہ ہوتی ہے:

<<وَ اذۡكُرُوۡۤا اِذۡ جَعَلَـكُمۡ خُلَفَآءَ مِنۡۢ بَعۡدِ قَوۡمِ نُوۡحٍ>> (الاعراف: ۶۹)

”اور (اے قوم عاد) یاد کرو جب کہ اللہ نے تم کو قوم نوح کے بعد خلیفہ بنایا۔“

<<وَ اذۡكُرُوۡۤا اِذۡ جَعَلَـكُمۡ خُلَفَآءَ مِنۡۢ بَعۡدِ عَادٍ>> (الاعراف: ۷۴)

”(اور اے قوم ثمود) یاد کرو جب کہ اس نے تمھیں عاد کے بعد خلیفہ بنایا۔“

<<عَسٰى رَبُّكُمْ اَنْ يُّهْلِكَ عَدُوَّكُمْ وَ يَسْتَخْلِفَكُمْ فِی الْاَرْضِ فَيَنْظُرَ كَيْفَ تَعْمَلُوْنَ>> (الاعراف: ۱۲۹)

”اے بنی اسرائیل! قریب ہے وہ وقت کہ تمھارا رب تمھارے دشمن (فرعون) کو ہلاک کرے اور زمین میں تم کو خلیفہ بنائے اور پھر دیکھے کہ تم کیسے عمل کرتے ہو۔“

<<ثُمَّ جَعَلْنٰكُمْ خَلٰئِفَ فِی الْاَرْضِ مِنْۢ بَعْدِهِمْ لِنَنْظُرَ كَيْفَ تَعْمَلُوْنَ>> (یونس: ۱۴)

”پھر ہم نے تمھیں زمین میں خلیفہ بنایا تاکہ دیکھیں تم کیسے عمل کرتے ہو۔“

لیکن یہ خلافت صحیح اور جائز خلافت صرف اسی صورت میں ہو سکتی ہے جب کہ یہ مالک حقیقی کے حکم کی تابع ہو۔ اس سے رُوگردانی کر کے جو خود مختارانہ نظامِ حکومت بنایا جائے وہ خلافت کے بجائے بغاوت بن جاتا ہے۔

<<هُوَ الَّذِيْ جَعَلَكُمْ خَلٰئِفَ فِی الْاَرْضِ ۚ فَمَنْ كَفَرَ فَعَلَيْهِ كُفْرُهٗ ۗ وَ لَا يَزِيْدُ الْكٰفِرِيْنَ كُفْرُهُمْ عِنْدَ رَبِّهِمْ اِلَّا مَقْتًا ۚ وَ لَا يَزِيْدُ الْكٰفِرِيْنَ كُفْرُهُمْ اِلَّا خَسَارًا>> (فاطر: ۳۹)

”وہی ہے جس نے تم کو زمین میں خلیفہ بنایا، پھر جو کفر کرے تو اس کا کفر اسی پر وبال ہے، اور کافروں کے حق میں ان کا کفران کے رب کے ہاں کسی چیز میں اضافہ نہیں کرتا مگر اس کے غضب میں، اور کافروں کے لیے ان کا کفر کوئی چیز نہیں بڑھاتا مگر خسارہ۔“

<<اَلَمْ تَرَ كَيْفَ فَعَلَ رَبُّكَ بِعَادٍ........ وَ ثَمُوْدَ الَّذِيْنَ جَابُوا الصَّخْرَ بِالْوَادِ وَ فِرْعَوْنَ ذِی الْاَوْتَادِ الَّذِيْنَ طَغَوْا فِی الْبِلَادِ>> (الفجر: ۶-۱۱)

”کیا تُو نے نہیں دیکھا کہ تیرے رب نے کیا کیا عاد کے ساتھ...... اور ثمود کے ساتھ جنھوں نے وادی میں پتھر تراشے، اور میخوں ڈالے فرعون کے ساتھ جنھوں نے ملک میں سرکشی کی؟“

<<اذْهَبْ إِلَىٰ فِرْعَوْنَ إِنَّهُ طَغَىٰ (۱۷) ...... فَقَالَ أَنَا رَبُّكُمُ الْأَعْلَىٰ (۲۴)>> (النازعات: ۱۷-۲۴)

” (اے موسیٰ!) جا فرعون کے پاس کہ وہ سرکش ہو گیا ہے۔ ...... فرعون نے لوگوں سے کہا کہ تمھارا رب برتر میں ہوں۔“

<<وَعَدَ اللَّهُ الَّذِينَ آمَنُوا مِنكُمْ وَعَمِلُوا الصّٰلِحٰتِ لَيَسْتَخْلِفَنَّهُمْ فِي الْأَرْضِ كَمَا اسْتَخْلَفَ الَّذِينَ مِن قَبْلِهِمْ ...... يَعْبُدُونَنِي لَا يُشْرِكُونَ بِي شَيْئًا>> (النور: ۵۵)

”تم میں سے جو لوگ ایمان لائے ہیں اور جنھوں نے نیک عمل کیے ہیں اللہ نے ان سے وعدہ کیا ہے کہ وہ انھیں زمین میں خلیفہ بنائے گا جس طرح اس نے ان سے پہلے لوگوں کو خلیفہ بنایا تھا ...... وہ میری بندگی کریں، میرے ساتھ کسی کو شریک نہ کریں۔“