خلافت و ملوکیت

چوتھا اہم قاعدہ جس پر یہ ریاست قائم ہوئی تھی، یہ تھا کہ حکومت اور اس کے اختیارات اور اموال، خدا اور مسلمانوں کی امانت ہیں جنہیں خدا ترس، ایمان دار اور عادل لوگوں کے سپرد کیا جانا چاہیے۔ اس امانت میں کسی شخص کو من مانے طریقے پر، یا نفسانی اغراض کے لیے تصرف کرنے کا حق نہیں ہے۔ اور جن لوگوں کے سپرد یہ امانت ہو وہ اس کے لیے جواب وہ ہیں۔ قرآن مجید میں اللہ تعالیٰ کا ارشاد ہے:

<<إِنَّ اللَّهَ يَأْمُرُكُمْ أَنْ تُؤَدُّوا الْأَمَانَاتِ إِلَى أَهْلِهَا وَإِذَا حَكَمْتُمْ بَيْنَ النَّاسِ أَنْ تَحْكُمُوا بِالْعَدْلِ إِنَّ اللَّهَ نِعِمَّا يَعِظُكُمْ بِهِ إِنَّ اللَّهَ كَانَ سَمِيعًا بَصِيرًا>> (النساء: ۵۸)

”اللہ تم کو حکم دیتا ہے کہ امانتیں اہل امانت کے سپرد کرو اور جب لوگوں کے درمیان فیصلہ کرو تو عدل کے ساتھ کرو۔ اللہ تمھیں اچھی نصیحت کرتا ہے۔ یقیناً اللہ سب کچھ سننے اور دیکھنے والا ہے۔“

رسول اللہ صلی اللہ علیہ وسلم کا ارشاد ہے:

<<الا كلكم راع و كلكم مسئول عن رعيته فالامام الاعظم الذى على الناس راع و هو مسئول عن رعيته>> [بخاری، کتاب الاحکام، باب ۱۔ مسلم، کتاب الامارۃ، باب ۵۔]

”خبردار رہو، تم میں سے ہر ایک راعی ہے اور ہر ایک اپنی رعیت کے بارے میں جواب دہ ہے۔ اور مسلمانوں کا سب سے بڑا سردار جو سب پر حکمراں ہو وہ بھی راعی ہے اور اپنی رعیت کے بارے میں جواب دہ۔“

<<ما من وال يلى رعية من المسلمين فيموت وهو غاش لهم الا حرم الله عليه الجنة>> [بخاری، کتاب الاحکام، باب ۸۔ مسلم، کتاب الایمان، باب ۶۱۔ کتاب الامارۃ، باب ۵۔]

”کوئی حکمراں، جو مسلمانوں میں سے کسی رعیت کے معاملات کا سربراہ ہو، اگر اس حالت میں مرے کہ وہ ان کے ساتھ دھوکا اور خیانت کرنے والا تھا، تو اللہ اس پر جنت حرام کر دے گا۔“

<<ما من امير يلى امر المسلمين ثم لا يجهد لهم ولا ينصح الا لم يدخل معهم فى الجنة>> [مسلم، کتاب الامارة، باب ۵۔]

”کوئی حاکم جو مسلمانوں کی حکومت کا کوئی منصب سنبھالے پھر اس کی ذمہ داریاں ادا کرنے کے لیے جان نہ لڑائے اور خلوص کے ساتھ کام نہ کرے وہ مسلمانوں کے ساتھ جنت میں داخل نہ ہوگا۔“

<<يا اباذر انك ضعيف وانها امانة وانها يوم القيامة خزى و ندامة الا من اخذ بحقها وادى الذى عليه فيها>> [کنز العمال، ج ۶، ح ۶۸-۱۲۳۔]

(نبی صلی اللہ علیہ وسلم نے حضرت ابوذرؓ سے فرمایا:) اے ابوذر! تم کمزور آدمی ہو اور حکومت کا منصب ایک امانت ہے۔ قیامت کے روز وہ رسوائی اور ندامت کا موجب ہوگا سوائے اس شخص کے جو اس کے حق کا پورا پورا لحاظ کرے اور جو ذمہ داری اس پر عائد ہوئی ہے اسے ٹھیک ٹھیک ادا کرے۔“

<<من اعون الخيانة تجارة الوالى فى رعيته>> [کنز العمال، ج۶، ح ۷۸۔]

”کسی حاکم کا اپنی رعیت میں تجارت کرنا بدترین خیانت ہے۔“

<<من ولى لنا عملا ولم تكن له زوجة فليتخذ زوجة، ومن لم يكن له خادم فليتخذ خادما، او ليس له مسكن فليتخذ مسكنا، او ليس له دابة فليتخذ دابة، فمن اصاب سوى ذالك فهو غال او سارق>> [کنز العمال، ج۶، ح ۳۴۶۔]

”جو شخص ہماری حکومت کے کسی منصب پر ہو وہ اگر بیوی نہ رکھتا ہو تو شادی کرلے، اگر خادم نہ رکھتا ہو تو ایک خادم حاصل کرلے، اگر گھر نہ رکھتا ہو تو ایک گھر لے لے، اگر سواری نہ رکھتا ہو تو ایک سواری لے لے۔ اس سے آگے جو شخص قدم بڑھاتا ہے وہ خائن ہے یا چور۔“

حضرت ابوبکر صدیقؓ فرماتے ہیں:

<<من يكن اميرا فانه من اطول الناس حسابا واغلظه عذابا، ومن لا يكون اميرا فانه من ايسر الناس حسابا واهونه عذابا لان الامراء اقرب الناس من ظلم المومنين ومن يظلم المومنين فانما يخفر الله>> [کنز العمال، ج۵، ح ۲۵۰۵]

”جو شخص حکمراں ہو اس کو سب سے زیادہ بھاری حساب دینا ہوگا اور وہ سب سے زیادہ سخت عذاب کے خطرے میں مبتلا ہوگا، اور جو حکمران نہ ہو اس کو ہلکا عذاب دینا ہوگا اور اس کے لیے ہلکے عذاب کا خطرہ ہے، کیونکہ حکام کے لیے سب سے بڑھ کر اس بات کے مواقع ہیں کہ ان کے ہاتھوں مسلمانوں پر ظلم ہو، اور جو مسلمانوں پر ظلم کرے وہ خدا سے غداری کرتا ہے۔“

حضرت عمرؓ کہتے ہیں:

<<لو هلک جمل من ولد الضان ضياعا بشاطئ الفرات خشيت ان يسالنى الله>> [کنزالعمال، ج۵، ح۲۵۱۲]

”دریاۓ فرات کے کنارے ایک بکری کا بچہ بھی اگر ضائع ہو جائے تو مجھے ڈر لگتا ہے کہ اللہ مجھ سے باز پرس کرے گا۔“