خلافت و ملوکیت

اس نظام میں رہنے والے مسلم وغیر مسلم باشندوں کے بنیادی حقوق یہ ہیں جنھیں تعدی سے محفوظ رکھنا ریاست کا فرض ہے: [بنیادی حقوق کے متعلق مزید بحث کے لیے ملاحظہ ہو تفہیمات، جلد سوم، مضمون ”انسان کے بنیادی حقوق“‘ ص ۲۴۸ تا ۲۶۸، مطبوعہ اسلامک پبلی کیشنز لمیٹڈ، لاہور]

(الف) جان کا تحفظ

<<وَلَا تَقْتُلُوا النَّفْسَ الَّتِيْ حَرَّمَ اللهُ إِلَّا بِالْحَقِّ>> (بنی اسرائیل: ۳۳)

”کسی جان کو جسے اللہ نے حرام کیا ہے حق کے بغیر قتل نہ کرو۔“

(ب) حقوق ملکیت کا تحفظ

<<وَلَا تَأْكُلُوْا أَمْوَالَكُمْ بَيْنَكُمْ بِالْبَاطِلِ>> (البقره: ۱۸۸-النساء: ۲۹)

”اپنے مال آپس میں ناجائز طریقوں سے نہ کھاؤ۔“

(ج) عزت کا تحفظ

<<لَا يَسْخَرْ قَوْمٌ مِّنْ قَوْمٍ .... وَلَا تَلْمِزُوْا أَنْفُسَكُمْ وَلَا تَنَابَزُوْا بِالْأَلْقَابِ .... وَلَا يَغْتَبْ بَّعْضُكُمْ بَعْضًا>> (الحجرات: ۱۱-۱۲)

”کوئی گروہ دوسرے گروہ کا مذاق نہ اڑائے ...... اور تم ایک دوسرے کو عیب لگاؤ، نہ ایک دوسرے کو برے لقب دو ...... نہ تم میں سے کوئی کسی کے پیٹھ پیچھے اس کی بدی کرے۔“

(د) نجی زندگی (privacy) کا تحفظ

<<لَا تَدْخُلُوْا بُيُوْتًا غَيْرَ بُيُوْتِكُمْ حَتَّى تَسْتَأْنِسُوْا>> (النور: ۲۷)

”اپنے گھروں کے سوا دوسرے گھروں میں داخل نہ ہو جب تک کہ اجازت نہ لے لو۔“

<<وَلَا تَجَسَّسُوْا>> (الحجرات: ۱۲)

”اور لوگوں کے بھید نہ ٹٹولو۔“

(ہ) ظلم کے خلاف آواز اٹھانے کا حق

<<لَا يُحِبُّ اللَّهُ الْجَهْرَ بِالسُّوءِ مِنَ الْقَوْلِ إِلَّا مَنْ ظُلِمَ>> (النساء : ۱۴۸)

”اللہ برائی پر زبان کھولنا پسند نہیں کرتا الا یہ کہ کسی پر ظلم ہوا ہو۔“

(و) امر بالمعروف و نہی عن المنکر کا حق جس میں تنقید کی آزادی کا حق بھی شامل ہے:

<<لُعِنَ الَّذِينَ كَفَرُوا مِنْ بَنِي إِسْرَائِيلَ عَلَى لِسَانِ دَاوُدَ وَعِيسَى ابْنِ مَرْيَمَ ذَلِكَ بِمَا عَصَوْا وَكَانُوا يَعْتَدُونَ * كَانُوا لَا يَتَنَاهَوْنَ عَنْ مُنْكَرٍ فَعَلُوهُ لَبِئْسَ مَا كَانُوا يَفْعَلُونَ>> (المائدہ: ۷۸-۷۹)

”بنی اسرائیل میں سے جن لوگوں نے کفر کیا ان پر داود اور عیسیٰ ابن مریم کی زبان سے لعنت کی گئی، یہ اس لیے کہ انھوں نے نافرمانی کی اور وہ زیادتیاں کرتے تھے، وہ ایک دوسرے کو برے کاموں کے ارتکاب سے روکتے نہ تھے، بہت بری بات تھی جو وہ کرتے تھے۔“

<<أَنْجَيْنَا الَّذِينَ يَنْهَوْنَ عَنِ السُّوءِ وَ أَخَذْنَا الَّذِينَ ظَلَمُوا بِعَذَابٍ بَئِيسٍ بِمَا كَانُوا يَفْسُقُونَ>> (الاعراف: ۱۶۵)

”ہم نے عذاب سے بچا لیا ان لوگوں کو جو برائی سے روکتے تھے اور پکڑ لیا ظالموں کو عذاب سخت میں اس فسق کے بدلے جو وہ کرتے تھے۔“

<<كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنْكَرِ وَتُؤْمِنُونَ بِاللَّهِ>> (آل عمران: ۱۱۰)

”تم وہ بہترین امت ہو جسے نکالا گیا ہے لوگوں کے لیے، تم نیکی کا حکم دیتے ہو اور بدی سے روکتے ہو اور اللہ پر ایمان رکھتے ہو۔“

(ز) آزادی اجتماع (freedom of association) کا حق، بشر طیکہ وہ نیکی اور بھلائی کے لیے استعمال ہو اور معاشرے میں تفرقے اور بنیادی اختلافات برپا کرنے کا ذریعہ نہ بنایا جائے۔

<<وَلْتَكُنْ مِّنْكُمْ أُمَّةٌ يَّدْعُوْنَ اِلَى الْخَيْرِ وَيَأْمُرُوْنَ بِالْمَعْرُوْفِ وَيَنْهَوْنَ عَنِ الْمُنْكَرِ ط وَاُولٰئِكَ هُمُ الْمُفْلِحُوْنَ o وَلَا تَكُوْنُوْا كَالَّذِيْنَ تَفَرَّقُوْا وَاخْتَلَفُوْا مِنْ بَعْدِ مَا جَاءَهُمُ الْبَيِّنٰتُ ط وَاُولٰئِكَ لَهُمْ عَذَابٌ عَظِيْمٌ o>> (آل عمران: ۱۰۴-۱۰۵)

”اور ہونا چاہیے تم میں سے ایک ایسا گروہ جو دعوت دے بھلائی کی طرف اور حکم دے نیکی کا اور روکے بدی سے، ایسے ہی لوگ فلاح پانے والے ہیں۔ اور نہ ہو جاؤ ان لوگوں کی طرح جو متفرق ہو گئے اور جنھوں نے اختلاف کیا جب کہ ان کے پاس واضح ہدایات آچکی تھیں۔ ایسے لوگوں کے لیے بڑا عذاب ہے۔“

(ح) ضمیر و اعتقاد کی آزادی کا حق،

<<لَا إِكْرَاهَ فِي الدِّيْنِ قَدْ>> (البقرہ: ۲۵۶)

”دین میں جبر نہیں ہے۔“

<<أَفَأَنْتَ تُكْرِهُ النَّاسَ حَتّٰى يَكُوْنُوْا مُؤْمِنِيْنَ>> (یونس: ۹۹)

”کیا تو لوگوں کو مجبور کرے گا کہ وہ مومن ہو جائیں؟“

<<وَالْفِتْنَةُ أَشَدُّ مِنَ الْقَتْلِ>> (البقرہ: ۱۹۱)

”فتنہ [فتنے سے مراد ہے کسی شخص پر تشدد کر کے اسے اپنا دین بدلنے پر مجبور کرنا۔ (ابن جریر، ج ۲، ص ۱۱۱)] قتل سے شدید تر چیز ہے۔“

(ط) مذہبی دل آزاری سے تحفظ کا حق

<<وَلَا تَسُبُّوا الَّذِيْنَ يَدْعُوْنَ مِنْ دُوْنِ اللهِ>> (الانعام : ۱۰۸)

”یہ لوگ خدا کو چھوڑ کر جن معبودوں کو پکارتے ہیں انھیں گالیاں نہ دو۔“ اس معاملے میں قرآن یہ صراحت کرتا ہے کہ مذہبی اختلافات میں علمی بحث تو کی جا سکتی ہے مگر وہ احسن طریقے سے ہونی چاہیے:

<<وَلَا تُجَادِلُوا أَهْلَ الْكِتٰبِ إِلَّا بِالَّتِي هِيَ أَحْسَنُ>> (العنکبوت: ۴۶) ”اہل کتاب کے ساتھ بحث نہ کرو مگر احسن (fair) طریقے سے۔“

(ی) یہ حق کہ ہر شخص صرف اپنے اعمال کا ذمہ دار ہو اور دوسروں کے اعمال کی ذمہ داری میں اسے نہ پکڑا جائے،

<<وَ لَا تَكْسِبُ كُلُّ نَفْسٍ إِلَّا عَلَيْهَا ۚ وَ لَا تَزِرُ وَازِرَةٌ وِّزْرَ أُخْرٰى>> (الانعام: ۱۶۴ - بنی اسرائیل: ۱۵ - فاطر: ۱۸ - الزمر: ۷ - النجم: ۳۸) ”ہر متنفس جو برائی کماتا ہے اس کا وبال اسی پر ہے اور کوئی بوجھ اٹھانے والا کسی دوسرے کا بوجھ نہیں اٹھاتا۔“ [یعنی ہر قصور وار آدمی جو قصور کا بھی ارتکاب کرتا ہے اس کا وہ خود ذمہ دار ہے، اس کے سوا کوئی دوسرا ماخوذ نہ ہوگا۔ اور کسی شخص پر اس کے اپنے قصور کے سوا دوسرے کے قصور کی ذمہ داری نہیں ڈالی جاسکتی۔“ (ابن جریر، ج ۸، ص ۸۳)]

(ک) یہ حق کہ کسی شخص کے خلاف کوئی کارروائی ثبوت کے بغیر اور انصاف کے معروف تقاضے پورے کیے بغیر نہ کی جائے،

<<إِنْ جَاءَكُمْ فَاسِقٌ بِنَبَإٍ فَتَبَيَّنُوا أَنْ تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نٰدِمِينَ>> (الحجرات: ۶) ”اگر کوئی فاسق تمہارے پاس کوئی خبر لے کر آئے تو تحقیق کر لو، ایسا نہ ہو کہ تم کسی گروہ کو بے جانے بوجھے نقصان پہنچا دو اور پھر اپنے کیے پر پچھتاؤ۔“

<<وَ لَا تَقْفُ مَا لَيْسَ لَكَ بِهِ عِلْمٌ>> (بنی اسرائیل: ۳۶) ”کسی ایسی بات کے پیچھے نہ لگ جاؤ جس کا تمہیں علم نہ ہو۔“

<<وَ إِذَا حَكَمْتُمْ بَيْنَ النَّاسِ أَنْ تَحْكُمُوا بِالْعَدْلِ>> (النساء: ۵۸) ”اور جب لوگوں کے معاملات میں فیصلہ کرو تو عدل کے ساتھ کرو۔“

(ل) یہ حق کہ حاجت مند اور محروم افراد کو ان کی ناگزیر ضروریات زندگی فراہم کی جائیں،

<<وَفِيٓ أَمْوَالِهِمْ حَقٌّ لِّلسَّآئِلِ وَالْمَحْرُومِ>> (الذاریات: ۱۹)

”اور ان کے مالوں میں حق ہے مدد مانگنے والے کا اور محروم کا۔“

(م) یہ حق کہ ریاست اپنی رعایا میں تفریق اور امتیاز نہ کرے بلکہ سب کے ساتھ یکساں برتاؤ کرے۔

<<إِنَّ فِرْعَوْنَ عَلَا فِي الْأَرْضِ وَ جَعَلَ أَهْلَهَا شِيَعًا يَّسْتَضْعِفُ طَآئِفَةً مِّنْهُمْ... إِنَّهٗ كَانَ مِنَ الْمُفْسِدِيْنَ>> (القصص: ۴)

”فرعون نے زمین میں سر اٹھایا اور اس کے باشندوں کو گروہوں میں تقسیم کیا جن میں سے ایک گروہ کو وہ کمزور بنا رکھتا تھا ...... یقیناً وہ مفسد لوگوں میں سے تھا۔“