خلافت و ملوکیت

اسی قاعدے کی فرع یہ تیسرا قاعدہ ہے جو اس ریاست کے مسلمات میں سے تھا کہ تمام مسلمانوں کے حقوق بلا لحاظ رنگ و نسل و زبان و وطن بالکل برابر ہیں۔ کسی فرد، گروہ، طبقے یا نسل و قوم کو اس ریاست کے حدود میں نہ امتیازی حقوق حاصل ہو سکتے ہیں اور نہ کسی کی حیثیت کسی دوسرے کے مقابلے میں فروتر قرار پا سکتی ہے۔ قرآن مجید میں اللہ تعالیٰ کا ارشاد ہے:

<<إِنَّمَا الْمُؤْمِنُونَ إِخْوَةٌ>> (الحجرات: ۱۰)

”مومن تو ایک دوسرے کے بھائی ہیں۔“

<<يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِنْدَ اللَّهِ أَتْقَاكُمْ>> (الحجرات: ۱۳)

”لوگو! ہم نے تم کو ایک مرد اور ایک عورت سے پیدا کیا اور تمہیں قبیلوں اور قوموں میں تقسیم کیا تا کہ تم ایک دوسرے کو پہچانو۔ درحقیقت اللہ کے نزدیک تم میں سب سے زیادہ عزت والا وہ ہے جو سب سے زیادہ متقی ہے۔“

نبی صلی اللہ علیہ وسلم کے حسب ذیل ارشادات اس قاعدے کی صراحت کرتے ہیں:

<<ان الله لا ينظر الى صوركم واموالكم ولكن ينظر الى قلوبكم واعمالكم>> [تفسیر ابن کثیر،بحوالۃ مسلم و ابن ماجہ، ج ۴، ص ۲۱۷، مطبعتہ مصطفٰی محمد، مصر، ۱۹۳۷ء]

”اللہ تمہاری صورتیں اور تمہارے مال نہیں دیکھتا بلکہ تمہارے دل اور تمہارے اعمال دیکھتا ہے۔“

<<المسلمون اخوة لا فضل لاحد على احد الا بالتقوى>> [ابن کثیر، بحوالۃ طبوانی، ج۴، ص ۲۱۷]

”مسلمان بھائی بھائی ہیں۔ کسی کو کسی پر فضیلت نہیں مگر تقویٰ کی بنا پر۔“

<<يايها الناس، الا ان ربكم واحد، لا فضل لعربى على عجمى، ولا لعجمى على عربى، ولا لاسود على احمر، ولا لاحمر على اسود الا بالتقوى>> [تفسیر روح المعانی، بحوالہ بیہقی و ابنِ مردویہ، ج ۲۶، ص ۱۸۴- ادارۃ الطباعۃ المنیریہ، مصر]

”لوگو! سن لو، تمہارا رب ایک ہے۔ عربی کو عجمی پر یا عجمی کو عربی پر کوئی فضیلت نہیں، نہ کالے کو گورے پر یا گورے کو کالے پر کوئی فضیلت ہے، مگر تقویٰ کے لحاظ سے۔“

<<من شهد ان لا اله الا الله واستقبل قبلتنا وصلى صلوتنا واكل ذبيحتنا فهو المسلم له ما للمسلم وعليه ما على المسلم>> [بخاری، کتاب الصلوٰۃ، باب ۲۸]

”جس نے شہادت دی کہ اللہ کے سوا کوئی خدا نہیں، اور ہمارے قبلے کی طرف رخ کیا، اور ہماری طرح نماز پڑھی، اور ہمارا ذبیحہ کھایا، وہ مسلمان ہے۔ اس کے حقوق وہی ہیں جو مسلمان کے حقوق ہیں اور اس پر فرائض وہی ہیں جو مسلمان کے فرائض ہیں۔“

<<المؤمنون تتكافئ دماؤهم، وهم يد على من سواهم، و يسعى بذمتهم ادناهم>> [ابو داود، کتاب الدیات، باب۱۱- نسائی، کتاب القسامہ، باب ۱۰،۱۴]

”مومنوں کے خون ایک دوسرے کے برابر ہیں، وہ دوسروں کے مقابلے میں ایک ہیں، اور ان کا ایک ادنیٰ بھی ان کی طرف سے ذمہ لے سکتا ہے۔“

<<لیس علی المسلم جزیة>> [ابو داود، کتاب الامارۃ، باب ۳۴]

”مسلمان پر جزیہ عائد نہیں کیا جا سکتا۔“