مولانا مودودی اور محترمہ مریم جمیلہ کی مراسلت

نیویارک

۴ مئی ۱۹۶۲ء

محترمی مودودی صاحب

شکر گزار ہوں کہ آپ نے خط (مورخہ ۱۸۔اپریل) تحریر فرمایا۔ آپ نے میری بیٹی مارگریٹ کو اپنے گھر میں آ کر رہنے کی جو دعوت دی ہے، اس کے لیے میں سراپا سپاس ہوں۔ میں اور میری بیگم آپ کے غیر معمولی جذبۂ مروّت و مہمانداری سے بے حد متاثر ہوئے ہیں۔

گزشتہ ایک برس سے جب سے کہ مارگریٹ نے اسلام قبول کیا اور ایک پُر جوش و سرگرم نو مسلم کی زندگی گزارنی شروع کی ہے، صاف نظر آتا ہے کہ ہماری سوسائٹی میں اس کے لیے کئی نوع کی عملی دشواریاں موجود ہیں۔ مارگریٹ آپ کی پیش کش قبول کرنے پر بڑے اشتیاق سے آمادہ ہے اور والدین کی حیثیت سے ہم اس کی خواہش کا احترام کرتے ہوئے اسے اسکی اجازت دیتے ہیں، اگرچہ وہ ایک دور دراز مقام پر چلی جائے گی۔ خصوصاً اسلام کے لیے وہ جس قدر گرم جوشی اور مستعدی رکھتی ہے، اس کے پیش نظر ہم بھی مطمئن ہیں کہ پاکستان میں اسے ایک پُر مسرت اور با مقصد زندگی گزارنے کا موقع ملے گا۔

ایک ایسے ملک میں رہائش اختیار کرنا جہاں کا کلچر قطعی نامانوس اور اجنبی ہو، وہاں کی معاشرت سے مطابقت حاصل کرنے کے لیے اچھی خاصی استقامت اور حوصلے کی ضرورت ہے۔ آپ کے خطوط میں جس ہمدردی، اخلاص اور عزم کا پتہ چلتا ہے اور خود مارگریٹ اسلام اور اب پاکستان کے لیے جو اشتیاق رکھتی ہے، اس کے پیش نظر ہمیں یقین ہے کہ وہ آپ کے خاندان میں مطمئن اور خوش رہے گی۔

آپ نے شہریت اور شادی کے بارے میں مارگریٹ کو جو مشورہ دیا ہے، اس پہ بھی میں بہت خوش ہوں۔ ایک باپ کی حیثیت سے میری بھی یہی رائے ہے کہ پاکستان میں ایک مناسب مدت کی رہائش کے بعد ہی اسے اس قسم کے دور رس اور ٹھوس عملی قدم اٹھانے چاہئیں۔

آپ کے ملک کو بھیجتے ہوئے ہماری دعائیں اس کے شامل حال رہیں گی اور ہم اس کی فوز و فلاح میں تواتر کے ساتھ دلچسپی برقرار رکھیں گے۔ اس لیے اس کے بارے میں آپ آئندہ بھی جب چاہیں، مجھے آگاہ کر سکتے ہیں اور اس کے لیے میں آپ کا شکر گزار ہوں گا۔

میری اہلیہ اور میری جانب سے آپ، آپ کی اہلیہ اور بچوں کے لیے نیک خواہشات۔

مخلص

ہر برٹ الیس۔ مارکوس