پردہ

حضورِ مساجد کی اجازت دینے کے ساتھ چند شرائط بھی مقرر کر دی گئیں۔ ان میں سے پہلی شرط یہ ہے کہ دن کے اوقات میں مسجد میں نہ جائیں۔ بلکہ صرف ان نمازوں میں شریک ہوں جو اندھیرے میں پڑھی جاتی ہوں یعنی عشا اور فجر :

<<عَنِ ابْنِ عُمَرَقَالَ قَالَ رَسُولُ اللہِ صَلَّی اللہُ عَلَیْہِ وَسَلَّمَ اِئْذَنُوْاللِنِّسَائِ بِالَّلیْلِ إلیالْمَسَاجِدِ۔ >> (سنن الترمذی، باب خروج النساء الی المسجدحدیث۵۲۰ وفی ہذا المعنی حدیث اخرجہ، البخاری فی باب خروج النساء الی المساجد باللیل والغلس)

قال نافع مولی ابن عمر وَکَأَنَّ اِخْتِصَاصُ اللَّیلِ بِذَالِکَ لِکَونِہِ أَسْتَرُ۔>> (فتح الباری، ج۳، ص۲۶۶)

حضرت ابن عمرؓ کے شاگرد خاص حضرت نافع کہتے ہیں کہ رات کی تخصیص اس لیے کہ رات کی تاریکی میں اچھی طرح پردہ داری ہوسکتی ہے۔

<<عَنْ عَائِشَۃَ قَالَتْ کَانَ رَسُولُ اللہِ صلی اللہ علیہ وسلم لَیُصَلِّی فَیَنْصَرِفُ النِّسَائَ مُتَلَّفِعَاَتٍ بِمُروطِھِنَّ مَا یَعْرِفَنَ مِنَ الْغَلَسِ۔>> [ترمذی، باب السفلیس فی الفجر ۔ اسی مضمون کی احادیث بخاری ( باب وقت الفجر ) مسلم ( باب استحباب التكبير باصح في اول وقعها ) ابوداؤد ( باب وقت اصح ) اور دوسری کتب حدیث میں بھی مروی ہیں۔ اس کے ساتھ یہ بھی کتب حدیث میں موجود ہے کہ نماز پڑھانے کے بعد نبی اکرم صلی اللہ علیہ وسلم اور تمام مرد نماز میں بیٹھے رہتے تھے تا کہ عورتیں اٹھ کر چلی جائیں۔ اس کے بعد آپ صلی اللہ علیہ وسلم اور سب لوگ کھڑے ہوتے۔]

حضرت عائشہؓ فرماتی ہیں کہ رسول اللہ ﷺ صبح کی نماز ایسے وقت پڑھتے تھے کہ جب عورتیں نماز کے بعد اپنی اوڑھنیوں میں لپٹی ہوئی مسجد سے پلٹتیں تو تاریکی کی وجہ سے پہچانی نہ جاتی تھیں۔

دوسری شرط یہ ہے کہ مسجد میں زینت کے ساتھ نہ آئیں اور نہ خوش بو لگا کر آئیں۔

حضرت عائشہؓ فرماتی ہیں کہ ایک مرتبہ حضور اکرم ﷺ مسجد میں تشریف فرما تھے کہ قبیلہ مزینہ کی ایک بہت بنی سنوری ہوئی عورت بڑے ناز و تبختر کے ساتھ چلتی ہوئی آئی۔حضوراکرم ﷺ نے فرمایا، لوگو! اپنی عورتوں کو زینت اور تبختر کے ساتھ مسجد میں آنے سے روکو۔ (ابن ماجہ، باب فتنہ النسا)

خوش بو کے متعلق فرمایا کہ جس رات تمھیں نماز میں شریک ہونا ہو اس رات کو کسی قسم کا عطر لگا کر نہ آؤ، نہ بخور استعمال کرو۔ بالکل سادہ لباس میں آؤ۔ جو عورت خوش بو لگا کر آئے گی اس کی نماز نہ ہو گی۔

تیسری شرط یہ ہے کہ عورتیں جماعت میں مردوں کے ساتھ خلط ملط نہ ہوں اور نہ آگے کی صفوں میں آئیں۔ انھیں مردوں کی صفوں کے پیچھے کھڑا ہونا چاہیے۔ فرمایا کہ:

<<خَیْرُ صُفُوفِ الرِّجَالِ أَوَّلُھَا وَشَرُّھَا آخِرُھَا۔ وَخَیْرُ صُفُوفِ النِّسَائِ آخِرُھَا وَشَرُّھَا اَوُّلُھَا۔>> (صحیح مسلم، کتاب الصلوٰۃ، باب تسویۃ الصفوف، حدیث۶۶۴)

مردوں کے لیے بہترین مقام آگے کی صفوں میں ہے اور بدترین مقام پیچھے کی صفوں میں اور عورتوں کے لیے بہترین مقام پیچھے کی صفوں میں ہے اور بدترین مقام آگے کی صفوں میں۔

جماعت کے باب میں حضور اکرمﷺ نے یہ قاعدہ بھی مقرر کر دیا تھا کہ عورت اور مرد پاس پاس کھڑے ہو کر نماز نہ پڑھیں خواہ وہ شوہر اور بیوی یا ماں اور بیٹا ہی کیوں نہ ہوں۔

حضرت انسؓ کا بیان ہے کہ میری نانی ملیکہؓ نے آں حضرت ﷺ کی دعوت کی۔ کھانے کے بعد آپ ﷺ نماز کے لیے اٹھے۔مَیں اور یتیم (یہ غالبًا حضرت انسؓ کے بھائی کا نام تھا) حضور اکرم ﷺ کے پیچھے کھڑے ہوئے اور ملیکہؓ ہمارے پیچھے کھڑی ہوئیں۔ [ترمذی، باب ما جاء فی الرجل يصلى ومعه رجال ونساء -]

حضرت انسؓ کی دوسری روایت ہے کہ حضور اکرمﷺ نے ہمارے گھر میں نماز پڑھی۔ مَیں اور یتیم آپ کے پیچھے کھڑے ہوئے اور میری ماں ام سلیمؓ ہمارے پیچھے کھڑی ہوئیں۔ [بخاری، باب المراة وحد با تکون صفا۔]

حضرت ابن عباسؓ کی روایت ہے کہ ایک مرتبہ حضور اکرم ﷺ نماز کے لیے اٹھے۔ مَیں آپ کے پہلو میں کھڑا ہوا اور حضرت عائشہؓ ہمارے پیچھے کھڑی ہوئیں۔ [نسائی، باب موقف الامام اذا کان معه صبی وامراة]

چوتھی شرط یہ ہے کہ عورتیں نماز میں آواز بلند نہ کریں۔ قاعدہ یہ مقرر کیا گیا ہے کہ اگر نماز میں امام کو کسی چیز پر متنبہ کرنا ہو تو مرد سبحان اللہ کہیں اور عورتیں دستک دیں۔ [التصفيق للنساء - ابوداؤد، باب التصفيق في الصلوة - بخاری، باب التصفيق للنساء]

ان تمام حدود و قیود کے باوجود جب حضرت عمرؓ کو جماعت میں ذکور و اناث کے خلط ملط ہونے کا اندیشہ ہوا تو آپ نے مسجد میں عورتوں کے لیے ایک دروازہ مختص فرما دیا اور مردوں کو اس دروازہ سے آنے جانے کی ممانعت کر دی۔ [ ابوداؤد، باب اعتزال النساء فی المساجد الرجال]