مکاتیب مودودی حصہ اول

محترمی و مکرمی، السلام علیکم ورحمۃ اللہ

آپ کا عنایت نامہ ملا۔ جن حضرات کو اعتراض کرنے کی بیماری لگی ہوئی ہے وہ ہر ممکن طریقہ سے اعتراض کی گنجائش نکالتے رہتے ہیں۔ ایسے لوگوں کی جواب دہی آخر کہاں تک کی جاسکتی ہے۔

مشرقی پاکستان کے سیلاب زدگان کی اعانت کے لیے مغربی پاکستان کے ہر حصے میں لوگوں سے امداد لی گئی تھی۔ ڈیڑھ لاکھ روپیہ اور ہزار ہا روپے کا سامان بھیجا گیا تھا۔ اب اگر ہم عوام کو اس کا حساب دیتے ہیں کہ جو کچھ لوگوں نے دیا تھا اس کو کس طرح صرف کیا گیا، تو یہ لوگ اسے دھندورا پیٹنے سے تعبیر کرتے ہیں۔ لیکن اگر ہم خاموش رہتے اور کوئی حساب نہ دیتے تو یہی لوگ کہتے کہ سارا روپیہ اور سامان جماعت اسلامی ہضم کر گئی اور حساب تک نہ دیا۔

ایسا ہی معاملہ اُن ہفتہ وار رپورٹوں کا ہے جو جماعت کے ایک ایک فرد سے ہفتہ وار اجتماع ارکان میں لی جاتی ہیں۔ اس کی غرض یہ ہے کہ ایک ایک رکن کی کارکردگی کا محاسبہ کیا جائے اور جو رکن بھی سستی دکھا رہا ہے اس کی سستی دور کی جائے، نیز جماعت کو برابر معلوم ہوتا رہے کہ اس کے ارکان کوئی کام کر رہے ہیں یا نہیں، اور کر رہے ہیں تو کیا کر رہے ہیں۔ ایسی چیز کو ایک بد گمان آدمی ریا کاری بھی قرار دے سکتا ہے۔ لیکن وہ یہ بھول جاتا ہے کہ جس خدا نے ریا کاری کو برا کہا ہے اسی نے بدگمانی سے بھی روکا ہے۔

تربیتی اجتماعات میں تہجد و نوافل کا اہتمام اس غرض کے لیے کیا جاتا ہے کہ ارکان جماعت کو ان چیزوں کی عادت پڑے۔ اس مقصد کے لیے کوشش کی جائے تو یہ عیب چین حضرات اسے ریا کاری قرار دیتے ہیں۔ کوشش نہ کیجیے تو یہی لوگ پرچا کرتے ہیں کہ جماعت اسلامی تو بس ایک سیاسی جماعت ہے، روحانیت سے اس کا کوئی تعلق نہیں ہے۔

میرا خیال یہ ہے کہ دینداری کے مدعی طبقے جب دوسروں کے عیب ڈھونڈنے اور ان کی نیکی کو بھی بدی بنانے پر اس طرح تل گئے ہوں تو آدمی کے لیے اس کے سوا کوئی چارہ نہیں کہ صبر کرے اور اپنے اور ان کے معاملے کو اللہ پر چھوڑ کر بس اپنے کام میں لگا رہے۔ ساری بار جیت اسی دنیا میں نہیں ہو جانی ہے۔ آخرت چاہے کسی کو یاد ہو یا نہ ہو، بہر حال وہ آکر رہے گی۔ اس وقت ہر ایک اپنا حساب خود دے لے گا۔ اگر ہم ریا کاری کر رہے ہیں تو چاہے اعمال حبط ہو جائیں گے۔ اور اگر یہ لوگ بغض و حسد کی بنا پر یا گروہی تعصبات کی بنا پر ہمیں بدنام کر رہے ہیں تو اپنا انجام خود دیکھ لیں گے۔

خاکسار

ابوالاعلیٰ

بنام مولانا سعدالدین صاحب، مردان

مورخه ۲۵، ستمبر ۶٣ء