مکاتیب مودودی حصہ اول

محترمی و مکرمی، <<السلام علیکم ورحمۃ اللہ>>

آپ کا عنایت نامہ ملا۔ آپ کے پیغام ہمدردی کا تہ دل سے شکر گزار ہوں۔ ہم سب اللہ تعالیٰ ہی کے بھروسے پر کام کر رہے ہیں اور اپنے آپ کو ہم نے اسی کے حوالے کر دیا ہے۔ ہمیں ہر حال حق کے لیے کام کرنا ہے اور اس راہ میں جو کچھ بھی آئے اس کے لیے ہم تیار ہیں۔ جس مرحوم کی قربانی اللہ تعالیٰ نے قبول فرمائی ہے وہ ہمارے لیے باعثِ رشک ہے۔ ہماری دلی تمنا ہے کہ اللہ ہم سب کو راہِ حق میں جان قربان کرنے کی توفیق دے [میں جماعت اسلامی کے سالانہ اجتماع منعقدہ بیرون بھاٹی دروازہ، لاہور میں جو غنڈہ گردی کرائی گئی تھی، اس میں پستول کی گولی لگنے سے ایک کارکن اللہ بخش شہید ہو گئے تھے۔ اس پر مکتوب الیہ نے اظہار ہمدردی اور مرحوم کی تعزیت کا خط مولانا محترم کو لکھا تھا۔ (مرتب)]۔

خاکسار

ابوالاعلیٰ

بنام نور محمد صاحب، ڈھاکا

مورخہ ۲، نومبر

81: بنام اے آر قیصر صاحب

محترمی و مکرمی، السلام علیکم و رحمتہ اللہ

آپ کا عنایت نامہ ملا۔ یہ معلوم کر کے خوشی ہوئی کہ میری وضاحت سے آپ کی غلط فہمیاں رفع ہو گئی ہیں۔ انشاء اللہ اس سے ہر اس شخص کی غلط فہمی رفع ہو جائے گی جو نیک نیتی کے ساتھ محض پروپیگنڈے نا واقفیت مجھ سے بدگمان تھا۔

کشمیر کے ساتھ میرا تعلق در حقیقت وہی ہے، جو میرے اپنے جسم کے کسی حصے کا تعلق میرے ساتھ ہے۔ جس طرح میں اپنے جسم کے کسی حصے کا قطع کیا جانا گوارا نہیں کر سکتا، اسی طرح کشمیر کی جدائی بھی گوارا نہیں کر سکتا۔ لیکن اپنے جسم کی حفاظت بھی میں شریعت و اخلاق کے حدود میں رہ کر ہی کرنا ضروری سمجھتا ہوں، اور اسی طرح میں اس کی حفاظت کے لیے حکمت و دانائی سے ہی تدبیر کروں گا۔ نادانی کے ساتھ کوئی کام نہ کروں گا۔

جہاں تک سابق ریاست جموں و کشمیر کے باشندوں کا تعلق ہے (خواہ وہ اب آزاد کشمیر میں ہوں یا مقبوضہ کشمیر میں)، ان کا یہ حق شریعت اور اخلاق کے لحاظ سے بالکل ناقابل انکار ہے کہ وہ اپنے وطن کو ہندوستان کے غاصبانہ قبضے سے نکالنے کے لیے جہاد کریں۔ کوئی ان کا یہ حق ان سے سلب نہیں کر سکتا۔ اور وہ شرعاً و اخلاقاً ان معاہدات کے پابند نہیں ہیں جو پاکستان نے کسی سے کیے ہوں، نیز باشندگان پاکستان کے لیے بھی شریعت و اخلاق کے لحاظ سے یہ بالکل جائز ہے کہ وہ اپنے کشمیری بھائیوں کو اس کام میں ہر طرح سے مدد دیں۔ البتہ بھلا جنگ کرنے یا نہ کرنے کے معاملہ میں پاکستان کے باشندے اپنی حکومت کے پابند ہیں۔ وہ جنگ کرے تو ہم جنگ کریں گے، اور اگر وہ جنگ سے باز رہے تو ہمیں بھی باز رہنا ہوگا۔ بین الاقوامی تعلقات میں اسلام ہمیں ان تمام معاہدات کا پابند کر دیتا ہے جو ہماری قوم نے اپنی حکومت کے توسط سے دنیا کی دوسری قوموں کے ساتھ کیے ہوں۔

خاکسار

ابوالاعلیٰ

بنام اے آر قیصر صاحب۔

چیف آرگنائزر ہائی کمان کشمیر جہاد کونسل، قصر المجاہدین، پشاور،

مورخہ ۳، نومبر ۶۳ء