مکاتیب مودودی حصہ اول

محترمی و مکرمی، السلام علیکم ورحمۃ اللہ

آپ کا عنایت نامہ ملا۔ آپ نے بزیرِ تبصرہ لکھا کہ وہ انگریزی تفسیر کونسی ہے جس میں ابن جریر طبری کی تفسیر کی یہ عبارت نقل کی گئی ہے، اور نہ یہ بتایا کہ اس تفسیر میں ابن جریر کے کس مقام کا حوالہ دیا گیا ہے۔ میری نگاہ سے تفسیر ابن جریر میں کوئی عبارت ایسی نہیں گزری ہے جس کا انگریزی ترجمہ وہ ہو جو آپ نے نقل کیا ہے۔ حوالہ آپ نے نقل کیا ہوتا تو اصل کتاب سے رجوع کر کے معلوم کر سکتا تھا کہ یہ عبارت کہاں کس سیاق و سباق میں آئی ہے۔ میں نے تفسیر ابن جریر کے وہ تمام مقامات دیکھے ہیں جہاں حضرت عیسیٰ کی پیدائش کا ذکر ہے۔ ہر جگہ ابن جریر خود بھی ان کی بے باپ پیدائش کے قائل نظر آتے ہیں اور تمام متعلقہ آیات کی تفسیر کرتے ہوئے جو روایات انھوں نے نقل کی ہیں وہ سب بھی اسی تاویل کی تائید میں ہیں۔

جو عبارت آپ نے نقل کی ہے وہ اگر صحیح بھی ہو تو لازماً اس کا یہی مطلب نہیں ہے کہ حضرت مریم کو حمل کسی مرد کے ساتھ ملاپ سے ٹھہرا تھا، بلکہ اس کا مطلب یہ بھی ہو سکتا ہے کہ جس طرح تمام بچے رحم مادر میں استقرار پاتے ہیں اسی طرح حضرت عیسیٰ کا استقرار بھی رحم مادر ہی میں ہوا تھا۔

یہ بات اصولی طور پر ذہن نشین کر لیجیے کہ کسی ایک حدیث سے کوئی ایسا مطلب لینا جو اُسی موضوع سے تعلق رکھنے والی تمام احادیث اور خود قرآن مجید کے بیانات کے خلاف پڑتا ہو، کوئی صحیح طرزِ استدلال نہیں ہے۔ حضرت عیسیٰ کی پیدائش کے بارے میں نبی صلی اللہ علیہ وسلم اور صحابہ اور تابعین سے جتنی روایات بھی حدیث و تفسیر میں نقل ہوتی ہیں وہ سب لفظاً یا معناً ان کے بے باپ پیدا ہونے ہی کی تصریح کرتی ہیں، اور کسی ایک روایت میں بھی یہ ذکر نہیں ملتا کہ ان کا کوئی باپ تھا۔ پھر سب سے بڑی بات یہ ہے کہ قرآن مجید خود ان کی پیدائش کو ایک معجزہ قرار دیتا ہے، ہر جگہ ان کا ذکر ”ابن مریم“ کی حیثیت سے کرتا ہے، حالانکہ بچے کو باپ کے بجائے ماں کی طرف منسوب کرنا عرب ہی کے نہیں، دنیا بھر کے معروف قاعدے کے خلاف ہے۔ اور قرآن کے تمام بیانات کو جمع کرکے دیکھا جائے تو ان سے لازماً یہی نتیجہ نکلتا ہے کہ وہ باپ کے بغیر پیدا ہوئے تھے۔ اس کے دلائل میں نے تفہیم القرآن میں تفصیل کے ساتھ بیان کر دیے ہیں (ملاحظہ ہو جلد اول صفحات ۲۵۰ تا ۲۵۲ - ۲۵۹- ۴۱۷ - جلد سوم صفحات ۵۹ – ۶۳ تا ۶۷ – 184- 281)۔

ان ساری چیزوں کے مقابلہ میں اگر کوئی شخص ابن جریر طبری کی صرف ایک ایسی روایت کا سہارا لیتا ہے جو خود دو معنوں کی محتمل ہے، تو وہ درحقیقت قرآن اور حدیث کی نہیں بلکہ اپنے نفس کی پیروی کرتا ہے۔

خاکسار

ابوالاعلیٰ

بنام حکیم محمد حسین صاحب، گجرات

مورخہ ۱۵ نومبر ۶۵ء