مکاتیب مودودی حصہ اول

محترمی و مکرمی، <<السلام علیکم ورحمۃ اللہ>>

آپ کا عنایت نامہ ملا۔ مجھے آپ کے خیالات معلوم کر کے بڑی خوشی ہوئی۔ یہ محض آپ کی نیک فطرت ہے جس کی وجہ سے آپ نے امریکہ میں رہ کر وہاں کی اخلاقی اور معاشرتی برائیوں کا اثر قبول کرنے کی بجائے ان کی قباحتوں کو ٹھیک ٹھیک محسوس کیا اور اس نعمت کی قدر کی جو اسلام کی برکت سے اس گئی گزری حالت میں بھی ہم مسلمانوں کو حاصل ہے۔ ورنہ عام طور پر تو ہمارے نوجوان یورپ اور امریکہ میں جا کر وہاں کی چمک دمک سے مرعوب ہو جاتے ہیں اور جن برائیوں کا سیلاب وہاں سے جاری ہے اسی میں غرق ہو جاتے ہیں، زیر آب اس بات کو خود بھی اچھی طرح سمجھ لیں، اور جو دوسرے نوجوان وہاں آپ کو مسلمان ملکوں سے آئے ہوئے ملیں، ان کے بھی ذہن نشین کر دیں کہ ہمیں یورپ اور امریکہ سے صرف علوم و فنون سیکھنے کی ضرورت ہے، ان کا معاشرتی فلسفہ اور طرز زندگی اور اخلاقی اصول لینے کی ضرورت نہیں ہے۔ اس معاملہ میں اسلام سے جو ہدایات ہمیں ملی ہیں وہ نہ صرف یہ کہ بدرجہا زیادہ ارفع و اعلیٰ ہیں، بلکہ خود مغرب بھی اگر تباہی سے بچنا چاہتا ہے تو اس کو ہم سے اس معاملہ میں رہنمائی لینی ہو گی۔

آپ اسلام کی بہترین خدمت اس طرح کر سکتے ہیں کہ جو علم بھی آپ امریکہ میں حاصل کر رہے ہیں اس کے ساتھ ساتھ اسلام سے بھی صحیح واقفیت پیدا کریں، اور پھر اہلِ مغرب کو، جہاں اور جس طرح بھی آپ ان تک اپنی بات پہنچانے کا موقع پائیں، اس بات سے آگاہ کرنے کی کوشش کریں کہ اخلاقی، تمدنی، معاشرت اور معاشی نظام کے بارے میں اسلام انسانی زندگی کی گتھیوں کا کیا حل پیش کرتا ہے۔

آپ نے جو سوالات کیے ہیں ان کے جوابات یہ ہیں:

۱- عیسائیوں کا مارا ہوا جانور حلال نہیں ہے، کیونکہ وہ نہ تو ٹھیک طریقہ سے ذبح کرتے ہیں جس سے جانور کے جسم کا پورا خون نکل جائے اور نہ ذبح کے وقت خدا کا نام لیتے ہیں۔ آپ یا تو یہودیوں کا ذبیحہ [یہودی، ابھی تک اللہ کا نام لے کر جانور ذبح کرتے ہیں، اور سؤر کو بھی حرام سمجھتے ہیں اس لیے ان کا ذبیحہ مسلمان کے لیے جائز ہے۔ یہ گوشت نیو گنیز کے نام سے امریکہ اور یوروپ کے ان شہروں میں مل جاتا ہے جہاں یہودیوں کی آبادی موجود ہے۔(مرتب)] کھائیں یا پھر اگر خود ذبح کرنے کا موقع ملتا ہو تو خود ہی کر لیا کریں۔

دوسرے سوال کے متعلق آپ میری کتاب ' اسلام میں مرتد کی سزا' کا مطالعہ کریں۔ اس سے آپ کو پوری طرح اس مسئلے کے متعلق معلومات حاصل ہو جائیں گی اور سارے اعتراضات کا جواب بھی مل جائے گا۔

خاکسار

ابوالاعلیٰ

بنام ڈاکٹر ایس مبین اختر صاحب۔ یو۔ ایس۔ اے

۱۱ فروری ۶۵ء