مکاتیب مودودی حصہ اول

برادرم ماهر صاحب، <<السلام علیکم و رحمۃ اللہ>>

عنایت نامہ ملا۔ جو حضرات میرے اور جماعت اسلامی کے خلاف دل کا بغض نکالتے ہیں، ان کے معاملہ کو میں نے اللہ کے حوالے کر دیا ہے، اس لیے ان کی ساری تحریریں پڑھتا ہوں اور اللہ کی عدالت کے سپرد کر کے اپنے کام میں لگ جاتا ہوں۔ میری عاقبت درست کرنے کے لیے جو کام ضروری ہیں وہی اتنے زیادہ ہیں کہ دوسرے کے کسی کام میں ایک لمحہ بھی صرف کرنا مجھے تضییع وقت نظر آتا ہے۔ یہ حضرات اپنی عاقبت سے غافل ہیں تو اور اپنی عاقبت ہی کے لیے میرے خلاف بولتے ہیں اور لکھنے کو مفید سمجھتے ہیں تو، دونوں صورتوں میں اپنے وقت اور محنت کا مصرف تجویز کرنے کی انھیں پوری آزادی ہے۔ میں انشاءاللہ ان کی کبھی مزاحمت نہیں کروں گا۔ اور کم از کم میری تو یہ خواہش بھی نہیں ہے کہ میرے رفقاء اور دوستوں میں سے کوئی ان کی مزاحمت کرے۔ مجھے پورا یقین ہے کہ جو حیثیت فی الواقع مجھے اللہ نے دی ہے اسے کوئی چھین نہیں سکتا اور جو حیثیت اللہ ہی نے مجھے نہیں دی وہ کوئی مجھے دلا نہیں سکتا۔ بہر حال اگر ان لوگوں کی زیادتیوں کو دیکھ کر کسی کو غضب اور غصّہ لاحق ہو ہی جائے تو میں اسے اللہ ہی کی خاطر نصرتِ حق سے باز رہنے کے لیے بھی نہیں کہتا، خصوصاً جبکہ وہ اللہ سے اجر کی امید پر یہ کام کر رہا ہو۔

برادرم، زبان کے معاملہ میں آپ کو معلوم ہونا چاہیے کہ میں اس کی صحت کا سخت اہتمام کرتا ہوں، اور اس باب میں دہلی ہی کی زبان کا پابند ہوں۔ میں نے مُرادِ قمر کے معنی میں اہلِ دہلی کو یا مثلاً اہلِ کو مذکر ہی بولتے سنا ہے۔ اسی طرح فیڈریشن کو مؤنث سنا بھی ہے اور پڑھا بھی۔ ”نہ سہی“ کے استعمال کو میں ادبی گناہ سمجھتا ہوں۔ مگر اس کا کیا علاج کروں کہ آج کل خود ہمارے اپنے حلقے کے لوگ اس مرض میں بُری طرح مبتلا ہیں، حتّٰی کہ خود میری بعض عبارتوں یا گفتگوؤں کو نقل کرتے ہوئے بطور خودنوشتہ کے بعد ہی بڑھا دیتے ہیں۔۔۔۔۔۔ میرے کسی مضمون میں اگر آپ نے یہ لفظ دیکھا ہو تو مجھے ضرور اس کا حوالہ دیں۔

کل اتفاق سے خواجہ شفیع صاحب میرے ہاں تشریف لائے۔ میں نے ان سے زنا کے متعلق پوچھا تو انھوں نے کہا کہ میرے کانوں نے کبھی کبھی دلی میں زنا کو مذکر نہیں سنا۔ بلکہ انھوں نے اس بات پر حیرت کا اظہار کیا کہ دلی والوں میں سے بھی کوئی اس لفظ کو مذکر بولتا ہے۔ یہی حال میرا بھی ہے کہ میں نے کبھی کسی دلی والے کو ”زنا کیا“ بولتے نہیں سنا اور مجھے بھی آپکے یہ سن کر حیرت ہی ہوئی کہ اہلِ دہلی میں سے کچھ حضرات اسے مذکر قرار دیتے ہیں۔ اب آپ واحدی صاحب اور دوسرے دلی والوں سے پوچھیے کہ خواجہ شفیع کی زبان بھی دلی کی ہے، یا نہیں۔

خاکسار

ابوالاعلیٰ

بنام ماھر القادری صاحب

ایڈیٹر 'فاران'، کراچی

۲۶، جنوری ۱۹۶۷ء