مکاتیب مودودی حصہ اول

مکرمی و محترمی، <<السلام عليكم ورحمة الله>>

آپ کا عنایت نامہ ملا۔ میرے نزدیک اسلام کے نام سے جو غلط مبحث اس ملک میں برپا ہے وہ تعمیر پاکستان کے لیے کوئی کار آمد اور نتیجہ خیز پروگرام کبھی نہ بننے دے گا۔ مختلف لوگوں نے اپنا ایک تصور اسلام بنا لیا ہے اور وہ اسلام کو پاکستان کا بنیادی نظریہ حیات تسلیم کرنے کے بعد اپنے اُسی مخصوص تصور کو روبعمل لانے کی کوشش کرتے ہیں۔ اس طرح وہی اختلاف جو پہلے دینی یا لادینی نظریہ کو ریاست کی بنیاد قرار دینے کی شکل میں رونما تھا، اس نے اب دوسری مشکل اختیار کر لی ہے اور اس اختلاف کی موجودگی میں کوئی تعمیری پروگرام بنانا اور چلانا سخت دشوار ہے۔

اب ضرورت ہے کہ اس خلط مبحث کو ختم کیا جائے اور ملک میں واضح نظریات کی بنیاد پر تحریکیں اور جماعتیں منظم ہوں۔ وہ جماعتیں جو خلط مبحث کرنے والے لوگوں پر مشتمل ہوں گی اس ملک میں اب کوئی تعمیری خدمت انجام نہیں دے سکتیں۔ جو لوگ لا دینی (سیکولرزم) کے حامی ہیں انھیں صاف صاف اپنے نظریے کا اظہار کرنا چاہیے اور اسلام کے نام سے دھوکا دینا چھوڑ دینا چاہیے۔ وہ لادینی کے نام پر لوگوں کو پکاریں۔ اور جو اس نام پر ان کی طرف آئیں انھیں اپنے گرد جمع کریں۔ اسی طرح جو جماعتیں جمہوریہ مسلمین کے اسلام سے مختلف اپنے کسی الگ اسلام کی قائل نہیں ہیں انھیں یہ صاف صاف کہہ دینا چاہیے کہ وہ کیا سب الله اور سنت رسول الله على صاحبها الصلوة والسلام اور اجماعِ امت کو مانتی ہیں اور محمد صلی الله علیہ وسلم کے سوا کسی دوسری ہستی کی تعلیمات کو مرجع ہدایت اور ماخذ شریعت تسلیم نہیں کرتیں اور یہ کہ ان کے دائرے میں کسی ایسے شخص کی گنجائش نہیں ہے جو اس عقیدے کا قائل نہ ہو۔ ان مؤخر الذکر جماعتوں کے درمیان اگر سر دست وحدت نہ ہو تو کم از کم اتحاد ہونا چاہیے اور انھیں ایک دوسرے سے تعاون کرنا چاہیے۔

بعض مسائل ایسے بھی ہو سکتے ہیں جو اہل ملک کے مشترک مفاد سے تعلق رکھتے ہوں۔ ان میں مقدم الذکر تینوں گروہوں کے درمیان کسی مفاہمت کی بنیاد پر ان مخصوص مسائل کی حد تک تعاون ہو سکتا ہے، مگر ایسی صورت میں جو مفاہمت بھی کی جائے وہ واضح بنیادوں پر ہونی چاہئیے اور اس امر کی تصریح ہونی چاہئیے کہ اشتراک عمل کس غرض کے لیے کس حد تک ہے۔

خاکسار

ابوالاعلیٰ

مولانا عبدالستار خان نیازی صاحب،

۲۲ جنوری ۶۳ ء