مکاتیب مودودی حصہ اول

محترمی و مکرمی، السلام علیکم و رحمۃ اللہ

عنایت نامہ ملا۔ مخلوط اور جداگانہ انتخاب اور بنیادی حقوق کے معاملہ میں آپ نے جو اعتراضات کیے ہیں ان کا مختصر جواب یہ ہے کہ جہاں تک ”اصول اسلام“ کا تعلق ہے، میں نے ان دونوں معاملات میں ان کو ہمیشہ صاف صاف بیان کیا ہے، جیسا کہ میری کتاب ’اسلامی ریاست‘ کے مطالعہ سے آپ پر واضح ہو سکتا ہے۔ لیکن جہاں تک عملاً ملک کے دستوری معاملات میں ان اصولوں کو تسلیم کرانے کا تعلق ہے، میں اس میں تدریج سے کام لینا زیادہ مناسب سمجھتا ہوں۔ کیونکہ حالات پوری بات کو بیک وقت تسلیم کرانے کے لیے سازگار نہیں ہیں، اور سو فی صدی حاصل کرنے پر ایسا اصرار جس سے ایک فیصدی بھی حاصل نہ ہو سکے عقلمندی نہیں ہے۔ بلکہ اس سے بھی آگے بڑھ کر اس روش کے اختیار کرنے سے الٹا اندیشہ یہ ہے کہ بعض نہایت قبیح نتائج سے ہمیں دوچار ہونا پڑے گا۔ مثلاً غیر مسلموں کو سرے سے ووٹ کا حق نہ دینے پر اگر ہم اصرار کریں تو اس میں کامیابی کا امکان نہیں ہے۔ لیکن اس کا نتیجہ یہ برآمد ہو گا کہ مخلوط انتخاب ہم پر مسلط ہو جائے گا جس کے بعد یہاں اسلامی حکومت قائم کرنے کے امکانات ہی ختم ہو جائیں گے، کجا کہ ہم کسی وقت غیر مسلموں کے حق رائے دہی کو ختم کراسکیں۔ اسی طرح بنیادی حقوق میں سے اگر ہم تبلیغ کفر کے حق کو خارج کرانے کی کوشش کریں تو اس وقت اس کا کوئی امکان نہیں ہے، لیکن اس پر اصرار کرنے کا نتیجہ یہ ہو گا کہ یہاں سرے سے کسی چندو اور تحریک چلانے کے مواقع ہی ختم ہو جائیں گے۔ انہی وجوہ سے ہم اپنے مقصود کی طرف درجہ بدرجہ آگے بڑھنا زیادہ مناسب سمجھتے ہیں۔ اس کو اگر آپ یہ معنی پہناتے ہیں کہ ہم سرے سے اسلامی دستور ہی کے خواہاں نہیں ہیں تو آپ کو سوچنے اور بولنے سے کون روک سکتا ہے۔

تصوف کے بارے میں میری عبارتوں پر آپ نے جو اعتراض کیا ہے اس سے یہ معلوم ہوتا ہے کہ آپ کے نزدیک آدمی کے لیے دو انتہاؤں میں سے کسی ایک پر جانا ہی ضروری ہے۔ یا تو وہ حضرت مجدد صاحبؒ اور شاہ صاحب کے سارے کارنامے پر پانی پھیر کر ان کی قطعی مذمت کر دے، یا پھر ان کے کام کو معصوموں کا کام قرار دے جس میں کسی پہلو سے نقص کا امکان نہ ہو۔ رہی یہ بات کہ آدمی خود شک کا بھرپور اعتراف بھی کرے اور ساتھ ساتھ نقص کے پہلوؤں کی طرف اشارہ بھی کر دے، تو یہ طریقہ آپ کے ذہن کو اپیل نہیں کرتا ۔ اس حالت میں آپ ہی مجھے بتائیں کہ میں آپ کو کیسے مطمئن کر سکتا ہوں۔

خاکسار

ابوالاعلیٰ

بنام ایس ایم الیاس، کالے منڈی ملتان

مورخہ ۲۸ دسمبر ۶۳ء