مکاتیب مودودی حصہ اول

محترمی و مکرمی، السلام علیکم ورحمۃ اللہ

عنایت نامہ ملا۔ یہ معلوم کرکے خوشی ہوئی کہ اسلامی جمعیت طلبہ میانوالی ایک کل پاکستان بین الجامعی مباحثہ اس موضوع پر منعقد کر رہی ہے کہ قیام امن عالم کے لیے اتحاد عالم اسلامی ناگزیر ہے۔ یہ ایک ناقابل انکار حقیقت ہے کہ عالم اسلام کا اتحاد جملہ اقوام عالم کے لیے امن و امان کا ایک بہترین نمونہ اور پیش خیمہ ثابت ہو سکتا ہے ۔ البتہ اس کے لیے شرط لازم یہ ہے کہ سب سے پہلے مسلمان ممالک غیر اسلامی نظریات و اثرات سے اپنے آپ کو پاک کریں اور ان کے حکمران محدود ذاتی یا قومی مفادات کو سامنے رکھنے کے بجائے خلوص نیت کے ساتھ اسلام کے عالمگیر عادلانہ اصولوں کی روشنی میں اپنے اختلافات اور تنازعات کو رفع کرنے اور باہمی یک جہتی قائم کرنے کی کوشش کریں۔

اس صدی میں پوری نوع انسانی دو مرتبہ جنگ عظیم کی بھٹی میں جھونکی جاچکی ہے، لیکن اس کے باوجود طاقت ور اور نام نہاد متمدن اقوام اپنی ہتھیاروں کے انبار جمع کرنے میں ایک دوسرے پر سبقت لے جانے میں رات دن لگی ہوئی ہیں۔ اس کے ساتھ ہی موجودہ منکرین پند و شعور سے اس خیال کو پیش کر رہے ہیں کہ انسانیت کو اُس وقت تک امن نصیب نہیں ہوسکتا جب تک مطلق العنان قومی ریاستیں اپنی خود مختاری کو ایک حد تک ترک کر کے ایک عالمی ریاست کو وجود میں نہ لائیں۔

لیکن اسلام کے اصولوں کو چھوڑ کر دنیا کے پاس کوئی مذہبی یا غیر مذہبی نظریہ ایسا نہیں ہے جو ورلڈ اسٹیٹ کی بنیاد بن سکے۔ عیسائیت اور بدھ ازم رہبانیت اور ترک دنیا کی تعلیم دیتے ہیں، اور سیاست اور اجتماع کے لیے کوئی رہنمائی فراہم نہیں کرتے ۔ ہندومت، مغربی سرمایہ داری اور اشتراکیت، تینوں نظام انسانی معاشرے کو جوڑنے کے بجائے اسے پھاڑتے اور انسان کو انسان کا دشمن بناتے ہیں۔ وہ اقوام عالم کو بھلا اتحاد کا کیا سبق دیں گے۔ اس کے بعد اب اسلام کی آفاقی تعلیمات ہی ہیں جو دنیا کے لیے بنائے امن و سکون ثابت ہو سکتی ہیں۔ ضرورت اس امر کی ہے کہ مسلمان جو اس امانت کے امین ہیں وہ پہلے خود اسلامی اخوت مساوات کے رشتے میں لپیٹے آپ کو پرویز میں اور پھر اپنے قول و عمل کی تبلیغ سے دنیا بھر کو اس رشتے میں منسلک ہونے کی دعوت دی۔

خاکسار

ابوالاعلیٰ

بنام شمیم احمد ہاشمی صاحب،

ناظم اسلامی جمعیت طلبہ میانوالی

مورخہ ۲۶ مارچ ۶۷ء