مکاتیب مودودی حصہ اول

محترمی و مکرمی، السلام علیکم و رحمۃ اللہ

آپ کا عنایت نامہ مورخہ ۱۳ مارچ بروقت مل گیا تھا۔ مگر میں بعض مصروفیتوں کی وجہ سے جلدی جواب نہ دے سکا۔ اس کے لیے پہلے ہی ایک خط کے ذریعہ سے معذرت پیش کر چکا ہوں۔ اب آپ کے سوالات کا جواب مختصراً عرض کرتا ہوں:

۱- علامہ اقبال مرحوم سے میری بس دو ہی ملاقاتیں ہوئی ہیں۔ ایک اُس زمانے میں جب مدراس سے پلٹتے ہوئے انھوں نے حیدرآباد میں اپنے مشہور چھ خطبات سنائے تھے۔ دوسری ۱۹۳۷ء کے آخر میں جب ان کے ارشاد پر میں نے پنجاب منتقل ہو جانے کا فیصلہ کیا۔ ان دونوں ملاقاتوں کا کوئی خاص تاثر اس مجموعی تاثر سے الگ اور مختلف نہ تھا جو میں پہلے ہی ان کے علم و فضل، ان کے تفکر اور ان کی خدمت اسلام کے بارے میں رکھتا تھا اور آج بھی رکھتا ہوں۔

۲- جی ہاں، یہ درست ہے کہ مجھے علامہ مرحوم ہی نے دکن چھوڑ کر پنجاب منتقل ہو جانے کا مشورہ دیا تھا اور انہی کے ارشاد کی بنا پر میں نے یہ "ہجرت" کی تھی۔

۳- کسی معاشرے میں کسی فکر کے مستقبل کا انحصار دو چیزوں پر ہوتا ہے۔ ایک یہ کہ وہ فکر بجائے خود دلوں اور دماغوں کو اپیل کرنے کی کتنی طاقت رکھتی ہے۔ دوسرے یہ کہ معاشرے میں ذہنی، اخلاقی اور علمی حیثیت سے کتنی قوتیں اس فکر کی تائید کرنے والی موجود ہیں۔ فکر اقبال کے معاملے میں پہلی چیز کے لحاظ سے تو کمی نہیں ہے، مگر دوسری چیز کی بڑی کمی ہے اور یہ کمی روز بروز بڑھتی جا رہی ہے۔ اس لیے یہ کہنا تو مشکل ہے کہ یہاں اس کا کوئی مستقبل نہیں ہے، مگر یہ کہنا بھی آسان نہیں ہے کہ بڑا شاندار مستقبل ہے۔

۴۔ یہ سوال ہے تو بڑا تفصیل طلب، لیکن چند الفاظ میں یہ کہا جا سکتا ہے کہ ”خودی“ سے مراد عرفانِ نفس ہے۔ دنیا و آخرت میں انسان کی فلاح و کامرانی کا سارا انحصار خود شناسی و خدا شناسی پر ہے۔ اور خدا شناسی بھی خود شناسی کے بغیر ممکن نہیں ہے۔ اس کے برعکس خود فراموشی و خدا فراموشی ہی تمام برائیوں کی جڑ ہے۔ اور خدا فراموشی میں بھی انسان خود فراموشی ہی کی وجہ سے مبتلا ہوتا ہے۔

۵۔ علامہ کے مشہور چھ خطبات پر اظہار رائے کا حق ایک مختصر خط میں ادا کرنا مشکل ہے، اور تفصیلی اظہار رائے کا اس وقت موقع نہیں ہے۔ یہ خطبات ایک ایسے زمانے میں تحریر کیے گئے تھے جب کہ اسلامی فکر و نظر اور دستور حیات پر مغرب کی یلغار نے دنیائے اسلام میں بڑی انقلاب انگیز شکل اختیار کر لی تھی اور اس پر ایک ہیجان برپا تھی۔ اس وقت جو ابتدائی کوششیں اسلامی عقیدے اور نظامِ فکر و عمل کو از سرِ نو مرتب کرنے کے لیے کی گئیں، ان میں علامہ مرحوم کے ان خطبات کا بڑا اہم مقام ہے۔ لیکن یہ کہنا صحیح نہ ہو گا کہ یہ ترتیب جدید بالکلیہ درست تھی۔ اس میں وقت کے حالات کا اثر بھی پایا جاتا ہے اور بعض مسائل کے بیان میں بھی خامیاں ہیں۔ اس لیے اگر کوئی اسے فکرِ اسلامی کی ترتیب نو کے معاملہ میں حرفِ آخر کہے تو غلط ہوگا۔ البتہ اس طرزِ خاص کے لٹریچر میں مُقَدَّمَةُ الجيش کی حیثیت سے اس کی قدر ناقابلِ انکار ہے۔

خاکسار

ابو الاعلیٰ

بنام شورش کاشمیری صاحب، لاہور

۲۷ مارچ ۶۵ء