سید مودودی کے خطوط

پروفیسر ڈاکٹر خالد محمود شیخ: (۲۲/جون ۱۹۴۰ - ۲۰۱۹ء) مظفر آباد شہر کے باشندے ہیں۔ ان کی پیدائش اسی شہر میں ہوئی اور ابتدائی تعلیم سے لے کر ایف ایس سی تک تعلیم کی منازل یہیں طے کیں۔ انٹر کالج مظفر آباد کے علمی و ادبی مجلے دومیل کے انگریزی حصے کے طالب علم مدیر رہے۔ جامعہ پنجاب سے بی اے اور پھر ایم اے انگریزی اور ایم اے عربی کے بعد جامعہ پنجاب سے ۱۹۸۵ء میں عربی میں پی ایچ ڈی کی ڈگری حاصل کی۔

دس سال تک قرآن اور حدیث پر دعوۃ اکیڈمی میں لیکچرز دیے۔ اسی طرح: امریکہ، آسٹریلیا، یورپ اور افریقہ میں قرآن، حدیث اور فقہ پر لیکچرز دیتے رہے۔ اقرا انٹرنیشنل ایجوکیشنل فاؤنڈیشن شکاگو کے ساتھ کام کیا اور مسلم اقلیت والے ممالک میں بچوں کے لیے نصاب مرتب کرنے میں فاؤنڈیشن کی مدد کی۔ یونیورسٹی آف برکلے نے نصاب کے لیے ۱۰۱ کتابوں میں سے ۵، اسلام پر منتخب کیں۔ ان میں سے ایک کتاب Dawah in Modern Age ڈاکٹر صاحب کی مرتب کردہ ہے۔ ڈاکٹر صاحب کی ایک اور کتاب Islam in Modern Age نیشنل بک فاؤنڈیشن نے شائع کی ہے۔ اپنی ملازمت کا آخری دورانیہ اُنھوں نے آزاد کشمیر یونیورسٹی کے شعبۂ اسلامیات (میرپور) میں گزارا۔ آج کل اسلام آباد میں مقیم ہیں۔

۷۹

اچھرہ، لاہور

۱۵/ اپریل ۱۹۷۱ء

مکرمی و محترمی! السلام علیکم ورحمۃ اللہ

آپ کا عنایت نامہ ملا۔ مولانا محترم آج کل بیمار ہیں چوں کہ ڈاکٹروں نے انھیں مکمل آرام کرنے کا مشورہ دیا ہے، اس لیے ان کے حسبِ ارشاد میں جواب عرض کر رہا ہوں۔ مولاناکے لیے کوئی موضوع تجویز کرنا اس حالت میں ممکن نہیں ہے۔ آپ خود ہی اپنے مطالعے اور ذوق کے مطابق موضوع منتخب کر کے اس پر کام کریں۔ آپ نے جس موضوع کا ذکر اپنے خط میں کیا ہے وہ بھی ایک اچھا موضوع ہے [ اُنھوں نے ابتدائی مشورہ ۱۹۷۱ء میں کیا تھا، پھر ۱۹۸۵ء تک بوجوہ ڈاکٹریٹ کی طرف توجہ نہ رہی۔ ۱۹۸۵ء میں ’’خلفائے راشدین کے خطبات/خطوط میں نظریۂ خلافت الہیہ کا تصور‘‘ کے موضوع پر پی ایچ ڈی کی تکمیل کی۔ عربی میں اس کا ترجمہ: نظام الخلافة في الاسلام ہے، جو کتابی شکل میں موجود ہے۔]اور اس پر کام کرنے کی ضرورت ہے۔

خاکسار

غلام علی

(معاون خصوصی مولانا سید ابوالاعلیٰ مودودی)