سید مودودی کے خطوط

ماہنامہ آئینہ کی جلد ۱۵، شمارہ ۱۲، دسمبر ۱۹۷۰ء کی اشاعت میں مولانا کے تین خط چھپے ہیں، جن میں سے دو یہاں درج کیے جاتے ہیں۔ اداریے اور پرچے کے دیگر مضامین اور مباحث کے مطالعے سے بڑی آسانی سے اندازہ لگایا جاسکتا ہے کہ یہ پرچہ بریلوی مکتب فکر کے اُس گروپ کا ترجمان ہے جس کی قیادت پیر قمرالدین سیالوی کرتے تھے۔ صادق ضیائی کی رپورٹ کے ساتھ مولانا کے خط (ٹائپ شدہ) نقل کیے گئے ہیں۔ صادق ضیائی کی رپورٹ کا عنوان ہے: امیر جماعتِ اسلامی مولانا سید ابوالاعلیٰ مودودی سے ۳۱ سوال۔ سوالات بھی درج کیے گئے ہیں اور رپورٹر نے آخر میں تحریر کیا ہے کہ مولانا ان کے سوالوں کا سامنا کرنے سے گریزاں ہیں۔ سوال کیا تھے؟ وہی جن کے جوابات کئی بار پہلے آچکے تھے۔ مثلاً: ابوالاعلیٰ نام کی وضاحت، تحریک پاکستان کی مخالفت، مولانا اصلاحی جماعت سے کیوں علیحدہ ہوئے وغیرہ۔

۷۷

اچھرہ، لاہور

مورخہ ۳۰ ستمبر ۱۹۷۰ء

محترمی و مکرمی! السلام علیکم ورحمۃ اللہ

آپ کا عنایت نامہ ملا۔ آج کل میرے اوپر مصروفیتوں کا بار بہت زیادہ ہے اور صحت کی خرابی کے باعث محنت میرے لیے اور زیادہ باعث تکلیف ہو رہی ہے، اسی لیے مصروفیتوں میں اضافہ کرنے سے حتی الامکان گریز کرتا ہوں۔ آپ کی بہت مہربانی ہو گی اگر آپ اپنے سوالات لکھ کر بھیج دیں۔ میں ان کے جوابات آپ کو بھیج دوں گا۔

خاکسار

ابوالاعلیٰ

۷۸

اچھرہ، لاہور

مورخہ ۱۶/ اکتوبر ۱۹۷۰ء

مکرمی و محترمی! السلام علیکم ورحمۃ اللہ

آپ کا عنایت نامہ ملا۔ اسے دیکھ کر اندازہ ہوا کہ آپ ہمیں فضول اور غیر ضروری مسائل میں الجھانا چاہتے ہیں۔ افسوس ہے کہ ہمارے پاس اتنا بے کار وقت نہیں ہے۔ اس لیے ہم آپ سے معذرت خواہ ہیں اور آپ سے توقع رکھتے ہیں کہ آپ آئندہ اس قسم کے سوالات میں اپنا اور ہمارا وقت ضائع نہیں کریں گے۔

خاکسار

غلام علی

یہ جواب میری ہدایت کے مطابق ہے۔

خاکسار

ابوالاعلیٰ