سید مودودی کے خطوط

برطانیہ میں مسلمانوں کی تعلیم و تربیت کے لیے ۱۹۶۲ء میں یو کے اسلامک مشن کی بنیاد رکھی گئی، جو اب برطانوی مسلمانوں کا ایک مؤثر فورم ہے۔ یو کے اسلامک مشن کے تیسرے سالانہ اجلاس منعقدہ ۱۹۶۶ء میں پہلی بار مولانا حبیب الرحمٰن کو صدر منتخب کیا گیا اور پھر ۱۹۷۳ء سے ۱۹۷۹ء تک وہ مشن کے صدر منتخب ہوتے رہے۔ اُن کے دور ہی میں مشن برطانیہ کے چیریٹی کمیشن میں رجسٹر ہوا اور اس کی جانب سے ایک ماہانہ پرچہ پیغام اُردو اور بنگلہ زبان میں جاری کیا گیا آپ آخر دم تک مشن کے ساتھ وابستہ رہے۔ ۲۰۱۷ء میں انتقال ہوا۔

٦٦

باسمۂ سبحانہ

اچھره، لاہور

۱۲ فروری ۱۹۶۹ء، ۲۴ ذیقعدہ ۱۳۸۶ھ

محترمی و مکرمی! السلام علیکم ورحمۃ اللہ

عنایت نامہ ملا۔ آپ نے میری صحت و عافیت کے متعلق جس مخلصانہ فکرمندی کا اظہار کیا ہے، اس کے لیے بہت ممنون ہوں۔ حقیقت یہ ہے کہ آپ لوگوں نے جس تندہی اور جانفشانی سے میری تیمار داری کی ہے اور میری ہر سہولت کا خیال رکھا ہے، اس کا میرے دل پر گہرا اثر ہے۔

اس میں شک نہیں کہ یہاں حالات بہت پر آشوب ہیں، مگر اللہ کی رحمت سے توقع ہے کہ وہ انھیں صحیح رُخ پر ڈال دے گا۔ آپ لوگ دُعا کرتے رہیں۔

میری کمزوری رفتہ رفتہ زائل ہوگی۔ فی الحال امارت کے فرائض تو میاں طفیل محمد صاحب ہی سنبھالے ہوئے ہیں، البتہ ناگزیر اور ضروری مشوروں میں میری شرکت بھی ہوتی ہے۔

آپ نے ہمت و عزم کے ساتھ اگر دین کی دعوت و اشاعت کا کام جاری رکھا اور حکمت اور تنظیم کے ساتھ جدوجہد کرتے رہے تو امید ہے کہ اللہ آپ حضرات کی مساعی کو مشکور اور بارآور بنا دے گا۔ سب احباب تک میرا اور یہاں کے دوسرے رفقا کا سلام پہنچادیں۔

خاکسار

ابوالاعلیٰ

بنام: مولانا حبیب الرحمٰن صاحب، صدر یوکے اسلامک مشن[یہ جملہ مولانا کا دست نوشت ہے۔]