سود

وہ اموال منقولہ (moveable properties) جن پر رقبہ جنگ میں اسلامی فوج اپنے اسلحے کی طاقت سے قابض ہو، اموال غنیمت ہیں۔ ان کا 5 / 1حصہ (یعنی خمس) حکومت کا حق ہے اور4 / 5 ان لوگوں کا حق جنھوں نے ان کو لوٹا ہو۔ امام ابویوسف رحمہ اللہ کتاب الخراج میں غنیمت کی تعریف اس طرح کرتے ہیں:

<<فَہٰذَا فِیْمَا یُصِیْبُ الْمُسْلِمُوْنَ مِنْ عَسَاکِرِ اَہْلِ الشِّرْکِ وَمَا اَجْلَبْوَا بِہٖ مِنَ الْمَتَاعِ وَ السَّلاَحِ وَالْکَرَاعِ>>۔[ابویوسف، الخراج، باب فی قسمۃ الغنائم۔۔۔إ ذا أصیبت من العدو]

خمس ان اموال میں ہے جو مسلمانوں کو اہل شرک کے لشکروں سے ہاتھ لگیں اور جو سازوسامان اور جانوروں کی قسم سے ہوں (یعنی اموال منقولہ)

دوسری جگہ پھر فرماتے ہیں:

<< فَمَا اَصَابَ الْمُسْلِمُوْنَ مِنْ عَسَاکِرِ اَہْلِ الشِّرْکِ وَمَا اَجْلَبُوْا بِہٖ مِنَ الْمَتَاعِ وَ الْکَرَاعِ وَالسَّلاَحِ وَ غَیْرَ ذٰلِکَ>>۔[ابویوسف، الخراج، باب فی قسمۃ الغنائم۔۔۔إ ذا أصیبت من العدو ]

اس سے ظاہر ہوا کہ غنیمت کا اطلاق صرف ان اموال منقولہ پر ہوتا ہے جو جنگی کارروائی (war-like operations) کے دوران میں غنیم کے لشکروں سے حاصل ہوں اور غنیم کے لشکروں کے حدود سے باہر عام آبادیوں کو لوٹتے مارتے پھر ناشریعت کی نگاہ میں درست نہیں۔ اگرچہ دارالحرب کے تمام اموال مباح ہیں اور اگر کوئی شخص غیر مقاتلین کے اموال سے تعرض کرے تو اس پر نہ کو ئی ضمان لازم ہوگا، نہ لوٹے ہوئے اموال واپس کیے جائیں گے، لیکن اس قسم کی لوٹ مار پسندیدہ نہیں ہے۔ امام مسلمین ہر ممکن طریقے سے اپنی فوجوں کو ایسی حرکات سے روکے گا کیونکہ نبیؐ کا ارشاد ہے کہ:

<< مَنْ غَزَا فَخْرًا وَرِیَائً وَ سَمْعَۃَ عَصَی الْاَمَامَ وَأَفْسَدَ فِی الْاَرْضِ فَاِنَّہٗ لَمْ یَرْجِعْ بِالکفَّافِ >>[جس شخص نے فخر کی نیت سے اور دنیا کو اپنی قوت و شجاعت دکھانے کے لیے اور ناموری حاصل کرنے کے لیے جنگ کی اور امام کی نافرمانی کی اور زمین میں فساد برپا کیا، اسے اجر ملنا تو درکنار وہ تو برابر بھی نہ چھوٹے گا۔(سنن ابی دائود، کتاب الجہاد، باب فیمن یغزو و یلتمس الدنیا، حدیث:2154)]