سود

اور اسی لیے میرا ناچیز خیال ہے کہ اس قسم کی تمام ’’آمدنیاں‘‘ جو مسلمانوں کو غیر اسلامی حکومتوں میں قانوناً میسر آ سکتی ہیں ، ان کو بجائے سود یا قمار یا جوا وغیرہ کہنے کے مناسب ہوگا کہ اس کا خاص نام ’’فَے‘‘ رکھ دیا جائے جس کے معنی گویا یہ ہوں گے کہ وہ مال جو بغیر کسی حرب و قتال، جنگ و جدال کے دوسری اقوام سے امن پسندانہ طور پر قانون وقت کی پوری پابندی کے ساتھ مسلمانوں کو ملا[شامی میں ہے: << وَمَا أَخَذَ مِنْھُمْ بِلَاحَرْبٍ وَلَاقَھْرٍ کَالْھَدْئَّۃِ وَالصُّلْحِ فَھُوَلَا غَنِیْمَۃَ وَلَافیٌٔ وَحُکْمُہُ حُکْمُ الفَیئِ>>۔ (رَداَلمختار ’’کتاب‘‘ الجہاد، باب المغنم وَ قسمتہ)

اور جو کچھ ان سے بغیر جنگ اور زبردستی کے لیا جائے مثلاً خراج یا مال صلح، تو وہ نہ غنیمت ہے اور نہ فَے بلکہ اس کا حکم فَی کا حکم ہے۔فتح القدیر میں ہے: << فَکَانَ ھٰذَا اکْتِسَاباً مُبَاحاً مِنَ الْمُبَاحَاتِ کَالْاٍ حْتِطَابِ وَالْاِ صْطِیَادِ>>۔ (کتاب السیر، فصل فی کیفیۃ القسمۃ) یہ ا کتساب مباحات میں ہوگا جیسے لکڑیاں چننا اور مچھلیاں پکڑنا۔ فَےکی تعریف سبل السلام میں ہے:<< ہُوَ مَا حَصَلَ لِلْمُسْلِمِیْنَ مِنْ اَمْوَالِ الْکُفَّارِ مِنْ غَیْر حَرْبٍ وَلَاجِہَادٍ>>۔(کتاب الجہاد، فصل و صایارسول اللہ لأمرائ الجیوش۔۔۔)وہ مال جو مسلمانوں کو کفار کے اموال میں سے بغیر جنگ و جہاد کے حاصل ہو۔ اور اراضی بنی نضیر کے متعلق خود قرآن میں ہے:۔<< مَااَوْجَفْتُمْ عَلَیْہِ مِنْ خِیْلٍ وَّلاَ رِکَابٍ>>۔ (الحشر59: 6)جس پر تم نے دوڑ دھوپ نہ کی ہو نہ گھوڑوں سے نہ اونٹوں سے۔تمام احادیث کی کتابیں معمور ہیں کہ اس فَے کی آمدنی سے اہل بیت نبوت کے ذاتی مصارف پورے ہوتے تھے۔ (م،ا، گیلانی)]

مجھے ایسا خیال آتا ہے کہ ہندی میں ایک لفظ ’’پھاؤ‘‘ کا ہے جو قریب قریب ’’فَے‘‘ کا ہم پلہ بھی ہے، اور غالباً ایک حد تک اسی معنی کو ادا بھی کرتا ہے۔ خواص توان آمدنیوں کو اپنی ’’فَے‘‘ کی آمدنی کہیں گے۔ عوام کی زبان پر (فے) نہ چڑھے گی تو وہ اس کو ’’پھاؤ‘‘ کہہ دیں گے۔ اس تعین اصطلاح کی ایک بڑی ضرورت وہ وجہ بھی ہے جو بعض ثقات اسلام کی جانب سے اس مسئلے کے متعلق بطور اندیشے یا خطرے کے پیش کیا جاتا ہے۔ ان کا خیال ہے کہ اگر اس مسئلے کا اعلان کر دیا گیا تو ممکن ہے کہ امتداد زمانے کے بعد مسلمان اس کو بھول جائیں گے کہ سود، قمار اور ازیں قبیل دوسرے ذرائع ان کی شریعت میں حرام بھی تھے یا نہیں۔ اس لیے میرا خیال ہے کہ ان آمدنیوں کا نام ’’فَے‘‘ رکھا جائے کہ اس لفظ سے مسلمانوں کو یہ یاد آتا رہے گا کہ غیر اقوام سے ان کے شرعی تعلقات کیا ہیں اور غیر اسلامی حکومتوں کے معاہدۂ امن کی تکمیل ان پر شرعاً کس حد تک لازم ہے۔[قرآن کی اصطلاح میں فَے صرف اس مال کو کہتے ہیں جو برسر جنگ قوم سے بغیر قتال کے حاصل ہو۔ سورۂ حشر پڑھ جایئے۔ تمام ذکر حالت جنگ کا ہے۔ بنی نضیر پر چڑھائی کی گئی۔ کار زار کی نوبت نہ آئی تھی کہ وہ مرعوب ہوگئے اور انھوں نے جلا وطن ہونا قبول کیا۔ اس موقع پر جو اموال مسلمانوں کے قبضے میں آئے ان کو فَے کہا گیا۔ یہ اصطلاح ان اموال پر کیوں کر چسپاں ہو سکتی ہے جو حالت امن میں غیر محارب کافروں سے سود اور قمار بازی اور سٹے اور دوسرے غیر اسلامی طریقوں سے حاصل کی جائے۔ پھر اگر یہ فَے ہو بھی، تو افراد امت فرداً فرداً اس کو کیسے کھا سکتے ہیں۔ اموالِ فَے کے متعلق قرآن میں تصریح ہے کہ وہ حکومت کے خزانے میں داخل کیے جائیں اور ان کو عام مصالح اسلامی پر صَرف کیا جائے۔ << مَا اَفَا اللّٰہُ عَلٰی رَسُوْلِہٖ مِنْ اَہْلِ الْقُرٰی فَلِلّٰہِ وَ لِلرَّسُوْلِ وَلِذِیْ الْقُرْبٰی وَالْیَتٰمٰی وَالْمَسَاکِیْنِ وَابْنَ السَّبِیْلِ >> (الحشر59:7) (مودودی)]

آخر جن کاروباری معاملات سے خدا ناراض نہیں ہے، قانون خوش، حکومت خوش، دینے والے خوش، ان کے اختیار کرنے میں مسلمانوں کو کس چیز سے ڈرنا چاہیے.