تحریک پاکستان اور مولانا مودودی

(اگر بین الاقوامی وفاق کی یہ صورت قبول نہ کی جائے تو دوسری صورت یہ ہوسکتی ہے کہ مختلف قوموں کے الگ الگ حدودارضی مقرر کر دئیے جائیں جہاں وہ اپنی جمہوری اسٹیٹ بناسکیں - پچیس سال یا اس سے کچھ کم وپیش مدت تبادلہ آبادی کے لیے مقرر کردی جائے - ہر اسٹیٹ کو زیادہ سے زیادہ اندرونی خود مختاری دی جائے اور وفاقی مرکز کے اختیارات کم از کم رکھے جائیں - اس صورت میں ہم غیرمتسلم ریاستوں کے ساتھ مل کر ایک وفاقی اسٹیٹ بنانے پر نہ صرف راضی ہوجائیں گے، بلکہ اس کو ترجیح دیں گے۔)

"میرے دوست ڈاکٹر عبداللطیف صاحب نے حال میں ہندوستان کے تہذیبی مستقبل (Cultural Future of India) پر جو مقالہ حیدر آباد سے شائع کیا ہے، وہ ہندوستان کی مختلف قوموں کے درمیان ارضی حدود کی تقسیم کا بہترین نقشہ پیش کرتا ہے۔ یہ ایک منصفانہ تقسیم ہے، جس کی رو سے مشرقی بنگال، حیدر آباد، بھوپال، جونا گڑھ، جاورہ، ٹونک، اجمیر، دتیہ اور شمالی و مغربی پنجاب، سندھ، سرحدی اور بلوچستان کے حلقے مسلمانوں کے لیے مخصوص ہو جاتے ہیں۔

اس طرح یہ ممکن ہے کہ پچیس سال کی مدت میں ہندوستان کے دوسرے خطوں سے ہجرت کرکے مسلمان ان حلقوں کے اندر سمٹ جائیں اور ہندو قریب کے علاقوں میں چلے جائیں۔ بقیہ ہندوستان میں اگر اچھوت اپنی الگ قومیت بنانا چاہیں تو ان کے لیے بلحاظِ ان کی آبادی کے مستقل رقبے مخصوص کیے جا سکتے ہیں (بشرطیکہ گاندھی جی خوبی کی دھمکی دے کر ان کی آزادیِ رائے کو پھر نہ سلب فرمائیں۔ اس طرح سکھوں کو بھی ان کی آبادی کے لحاظ سے ایک رقبہ دیا جا سکتا ہے۔)