شخصیات

ابن قتیبہ کے متعلق یہ خیال بالکل غلط ہے کہ وہ شیعہ تھا۔ وہ ابو حاتم السجستانی اور اسحاق بن راہویہ جیسے ائمہ کا شاگرد اور دینور کا قاضی تھا۔ ابن کثیر اس کے متعلق لکھتے ہیں کہ ”كَانَ لُقْطَةٌ نَبِيْلاً(“ وہ ثقہ اور صاحب فضل و شہرت آدمی تھا۔)حافظ ابن حجر کہتے ہیں ”صَدُوْقٌ (نهایت سچا آدمی)، خطیب بغدادی کہتے ہیں ”كَانَ ثِقَةً دَيِّنًا فَاضِلاً“( وہ ثقہ، دین دار اور فاضل تھا )، مسلمہ بن قاسم کہتے ہیں ”كَانَ صَدُوْقاً مِنْ اَهْلِ السُّنَّةِ يُقَالُ كَانَ يُذْهَبُ اِلَى اقْوَالِ اِسْحَاقَ بْنِ رَاهَوَيْه( نہایت سچا آدمی تھا ۔ اہل سنت میں سے تھا۔ کہا جاتا ہے کہ وہ اسحاق بن راہویہ کا پیرو تھا)۔ ابن حزم کہتے ہیں ”ثِقَةٌ فِیْ دِیْنِہٖ وَعِلْمِہٖ (اپنے دین اور علم میں بھروسے کے قابل )ابن حجر اس کے مذہب پر روشنی ڈالتے ہوئے لکھتے ہیں <<قَالَ السَّلَفِىُّ كَانَ ابْنُ قُتَيْبَةَ مِنَ الثِّقَاتِ وَاَهْلِ السُّنَّةِ وَلَكِنَّ الْحَاكِمَ كَانَ يَقْصِدُهُ مِنْ اَجْلِ الْمَذْهَبِ ….. وَالَّذِىْ يَظْهَرُ لِيْ اَنَّ مُرَادَ السَّلَفِىْ بِالْمَذْهَبِ التَّعَصُّبُ ، فَاِنَّ فِي ابْنِ قُتَيْبَةَ انْحِرَافاً عَنْ اَهْلِ الْبَيْتِ وَالْحَاكِمُ عَلَى ضِدٍّ مِّنْ ذَالِكَ(>> السلفی کہتے ہیں کہ ابن قتیبہ ثقہ اور اہل سنت میں سے تھا مگر حاکم بر بنائے مذہب اس کے مخالف تھے ….میرا خیال یہ ہے کہ مذہب سے سلفی کی مراد ناصبیت ہے، کیوں کہ ابن قتیبہ میں اہل بیت سے انحراف پایا جاتا تھا اور حاکم اس کے برعکس تھے [البداية والنهاية ، ج ۱۱ ، صفحه ۴۸ - ۵۰ - لسان المیزان ، ج ۳، ص ۳۵۷ تا ۳۵۹]۔

اس سے معلوم ہوا کہ شیعی ہونا تو درکنار ابن قتیبہ پر تو آلٹا صبی ہونے کا الزام تھا۔

رہی اُس کی کتاب الامامۃ والسیاسۃ، اُس کے متعلق یقین کے ساتھ کسی نے بھی یہ نہیں کہا ہے کہ وہ ابن قُتَیبَہ کی نہیں ہے۔ صرف شک ظاہر کیا جاتا ہے، کیوں کہ اس میں بعض روایات ایسی ہیں جو ابن قُتَیبَہ کے علم اور اُس کی دوسری تصنیفات کے ساتھ مناسبت نہیں رکھتیں۔ میں نے خود یہ پوری کتاب پڑھی ہے، اور اُس کی چند روایتوں کو میں بھی الحاقی سمجھتا ہوں۔ مگر ان کی بنا پر پوری کتاب کو رد کر دینا میرے نزدیک زیادتی ہے۔ اس میں بہت سی کام کی باتیں ہیں اور اُن میں کوئی علامت ایسی نہیں پائی جاتی جس کی بنا پر وہ ناقابلِ قبول ہوں۔ علاوہ بریں میں نے اس سے کوئی روایت ایسی نہیں لی ہے جس کی معنیٰ تائید کرنے والی روایات دوسری کتابوں میں نہ ہوں، جیسا کہ میرے دیئے ہوئے حوالوں سے ظاہر ہے۔ (خلافت و ملوکیت)