اسلام اور ضبط ولادت

حامیانِ ضبطِ ولادت تسلیم کرتے ہیں کہ انواع کی تعداد کوایک حد ِمناست کے اندر محدود رکھنے کا انتظام خود فطرت نے کیا ہے اور یہ انتظام نوعِ انسانی پر بھی حاوی ہے لیکن وہ کہتے ہیں کہ فطرت اس کام کو موت کے ذریعہ سے انجام دیتی ہے جس میں انسان کے لیے سخت روحانی اور جسمانی اذیتیں ہیں۔ کیوں نہ ہم اس کے بجائے خود اپنی احتیاطی تدبیروں سے اپنی آبادی کو محدود رکھنے کا انتظام کر لیں؟ زندہ انسانوں کے لقمہ ٔاجل ہونے، طرح طرح کی تکلیفوں سے جان دینے، اور پسماندوں کے تڑپ تڑپ کر رہ جانے سے تو بدرجہا بہتر یہ ہے کہ ضرورت سے زیادہ انسان پیدا ہی نہ ہوں۔

یہاں پھر یہ لوگ خدائی انتظام میں مداخلتِ بے جا کے مرتکب ہوتے ہیں۔ ہم پوچھتے ہیں کہ تمھاری احتیاطی تدبیروں سے کیا جنگ، وبائیں، امراض، سیلاب، زلزلے، طوفان، ریلوں اور موٹروں اور بحری اور ہوائی جہازوں کے حادثے سب بند ہو جائیں گے؟ کیا تم نے خدا (یا بزعم خود ’’فطرت‘‘) سے کوئی ایسا معاہدہ کر لیا ہے کہ جب تم ضبط ِولادت پر عمل شروع کرو گے تو فرشتۂ موت کو برطرف کر دیا جائے گا؟ اگر ایسا نہیں ہے اور یقینا نہیں ہے تو بتاؤ کہ ضبط ِولادت اور فرشتۂ موت دونوں کی کارگزاری کا تختۂ مشق بن کر نوعِ انسانی کا کیا حشر ہو گا؟ ایک طرف تم خود اپنے ہاتھوں سے اپنی آبادیوں کو گھٹا رہے ہو۔ دوسری طرف زلزلے ہزاروں آدمیوں کو بیک وقت نذرِ اجل کرتے رہیں گے، سیلابوں اور طوفانوں میں بستیوں کی بستیاں اُجڑتی رہیں گی، حادثوں میں لاکھوں آدمی مرتے رہیں گے، وبائیں آ کر آبادیوں پرجھاڑو پھیرتی رہیں گی، لڑائیوں میں تمھارے اپنے سائنٹفک آلات لاکھوں بلکہ کروڑوں آدمیوں کوموت کے گھاٹ اتار دیں گے اور موت کا فرشتہ فرداً فرداً بھی آدمیوں کی روحیں قبض کرتا رہے گا۔ کیا تم حساب لگا کر اتنا بھی معلوم نہیں کرسکتے کہ جس خزانے میں آمد گھٹتی چلی جائے اور خرچ بدستور رہے وہ کب تک بھرپور رہے گا۔[صرف یورپ میں (روس چھوڑ کر) پہلی جنگ عظیم کی وجہ سے آبادی میں دو کروڑچوبیس لاکھ افراد کی کمی واقع ہوئی تھی۔ اس میں فوجیوں کی اموات، عام شرح سے زیادہ شہری آبادی کی اموات، اور ایک کروڑ چھبیس لاکھ افراد کی کمی بطور قلت پیدائی (birth deficit) شامل ہیں۔ روس میں پہلی جنگ اور اشتراکی انقلاب کی وجہ سے پیدائش میں ایک کروڑ افراد کی کمی ہوئی۔ جرمنی کے متعلق اندازہ کیا گیا ہے کہ نو لاکھ افراد جنگ میں کام آئے، پچیس لاکھ بچے شادیوں کے ٹوٹنے سے اورچھبیس لاکھ بچے جنگ میں شرح پیدائش کے کم ہو جانے کی وجہ سے کم پیدا ہوئے۔

دوسری عالمی جنگ میں اموات کا اندازہ پچانوے لاکھ سے ایک کروڑ افراد تک ہے۔ شرح پیدائش میں کمی کی وجہ سے صرف فرانس میں بارہ لاکھ افراد کی کمی ہوئی اور بیلجئم کی حالت اس سے بھی زیادہ ناگفتہ بہ تھی۔ اسی بنا پر یہ کہا جاتا ہے کہ ’’جنگ انسانوں کو کم کر دیتی ہے اور یہ کمی صرف میدانِ جنگ ہی میں نہیں ہوتی بلکہ شریک جنگ ملک کے گھروں میں بھی ہوتی ہے۔ صرف برسر پیکار نسل ہی میں نہیں ہوتی آنے والی نسلوں میں بھی ہوتی ہے۔‘‘(Landis Paul: Social Problems, P:677-79)

اسی طرح قحطوں کا سلسلہ ہے۔ 1920-21ء میں چین میں 5لاکھ افراد قحط کی وجہ سے لقمۂ اجل ہوئے۔ 1940-43ئ میں تقریباً ساٹھ لاکھ افراد کو دریائے زروکی وادی میں قحط اور سیلاب نے اپنے نرغہ میں لیا اور اندازہ ہے کہ ان میں سے 10لاکھ موت کی نظر ہوئے۔ 1943-46ئ میں قحط کی وجہ سے یونان کی پوری آبادی کے نیست و نابود ہو جانے کا خطرہ پیدا ہوگیا تھا اور ریڈ کراس کی غیر معمولی مدد کے باوجود ہزاروں افراد ختم ہوگئے۔

وباؤں کی وجہ سے بھی اموات کا سلسلہ برابر جاری ہے۔ انفلوئنزا کی وجہ سے 1918-19ئ میں امریکہ میں پانچ لاکھ اموات ہوئیں۔ ہندوستان میں اسی وبا کی وجہ سے ڈیڑھ کروڑ افراد مرے، اور ٹاہٹی (Tahiti)میں آبادی کا ساتواں حصہ ختم ہوگیا۔ جن کی وجہ سے جتنی اموات واقع ہوئی ہیں، امراضِ خبیثہ سے ان سے بھی زیادہ اموات ہو رہی ہیں۔]

اس سوال کو بھی جانے دو کیا تمھارے پاس اپنی آبادیوں کے لیے ’’حدِ مناسب‘‘ مقرر کرنے کا کوئی معیار ہے؟ اگر بالفرض ہے، تو کیا تم اس معیار کے مطابق حسب ضرورت بچے پیدا کرنے اور صرف ضرورت سے زیادہ بچوں کی پیدائش روک دینے پر قادر ہو؟ جب عوام الناس میں خود غرضانہ ذہنیت پیدا ہو جائے اور وہ اپنے شخصی حالات اورنفسانی رجحانات کی بناء پر بچوں کی ضرورت وعدم ضرورت کا فیصلہ کرنے میں آزاد ہوں، اور ضبط ِولادت کے عملی طریقے اور وسائل بھی آسانی کے ساتھ ان کو بہم پہنچ جائیں، تو کیا یہ ممکن ہے کہ ملکوں اور قوموں کی آبادی کو کس مناسب حد تک ہی گھٹایا جائے اور اس حد سے زیادہ نہ گھٹنے دیا جائے؟ قیاس کی ضرورت نہیں، تجربہ شہادت دے رہا ہے کہ دنیا کے سب سے زیادہ ترقی یافتہ ممالک بھی ایسی کوئی حدِ مناسب مقرر کرنے اور افراد کے عمل کو اس حد کے اندر محدود رکھنے میں کامیاب نہیں ہو سکے ہیں۔ پھر وہ کیا سامان ہے جس کو لے کر تم اس خدائی تدبیر میں داخل دینے چلے ہو جس کے تحت وہ خود انسانی بستیوں کے لیے ’’حدِ مناسب‘‘ مقرر کرتا اور ایک اندازے کے ساتھ ان کو گھٹاتا بڑھاتا ہے؟