خطبات حرم

باہر سے آنے والے ہر حاجی کی فطری خواہش یہ ہوتی ہے، اور یہی اس کو کرنا بھی چاہیئے کہ مکہ معظمہ پہنچنے کے بعد جلد ہی حرم میں حاضر ہو، پھر جب وہ حرم میں داخل ہوتا ہے اور بیت اللہ پر اس کی نظر پڑتی ہے تو اس کے دل پر ایک ہیبت طاری ہوتی ہے جو اللہ تعالیٰ کے جلال کا کرشمہ ہے، اور اس کا دل بے اختیار خانہ کعبہ کی طرف کھنچتا ہے جو اللہ جل شانہٗ کی محبت کا فطری تقاضا ہے۔ اس موقع پر اسے دل اور زبان سے اللہ اکبر، لا الہ الا اللہ، واللہ اکبر کہنا چاہیئے اور پورے شعور کے ساتھ اللہ تعالیٰ سے یہ دعا کرنی چاہیئے:

<<اللّٰهُمَّ زِدْ هٰذَا الْبَيْتَ تَشْرِيْفاً وَ تَعْظِيْماً وَ تَكْرِيْماً وَ مَهَابَةً وَ بَرّاً>>

”خدایا اس گھر کو زیادہ سے زیادہ عظمت و شرف اور بزرگی اور رعب و دبدبہ عطا فرما، اور اسے زیادہ سے زیادہ نیکیوں کا مرکز بنادے۔“

<<اللّٰهُمَّ أَنْتَ السَّلَامُ، وَمِنْكَ السَّلَامُ ، فَحَيِّنَا رَبَّنَا بِالسَّلَامِ>>

”خدایا تو ہر عیب و نقص سے پاک ہے، اور عیوب و آفات سے سلامتی جس کو بھی نصیب ہوتی ہے تیری ہی طرف سے نصیب ہوتی ہے، لہٰذا اے پروردگار ہمیں جسم و روح کی سلامتی کے ساتھ جینے کی توفیق عطا فرما۔“

ضروری نہیں ہے کہ یہ دعائیں آپ عربی زبان ہی میں مانگیں۔ اصل چیز ان الفاظ و زبان سے ادا کرنا نہیں ہے بلکہ اُس مضمون کی دعا اللہ سے مانگنا ہے جو ان منقول دعاؤں میں بیان کیا گیا ہے۔ آپ کو عربی الفاظ یاد کرنے اور پڑھنے میں دقت ہو تو آپ اسی مضمون کی دعا اپنی زبان میں بھی مانگ سکتے ہیں۔