حقوق الزوجین

۱۹۳۳-۳۴ کی بات ہے۔ حیدرآباد دکن، بھوپال اور برطانوی ہند میں یہ مسئلہ بہت زور شور کے ساتھ اٹھا تھا کہ مسلمانوں کے ازدواجی معاملات میں جو خرابیاں رائج الوقت قانون کے نقائص کی وجہ سے پیدا ہو رہی ہیں، اُن کو دُور کرنے اور شرعِ اسلامی کے احکام کو صحیح طور پر نافذ کرنے کے لیے کوئی نتیجہ خیز سعی ہونی چاہیے۔ چنانچہ اس سلسلے میں بہت سے مسوداتِ قانون ہندوستان کے مختلف گوشوں میں مرتب کیے گئے اور کئی سال تک ان کی بازگشت سنی جاتی رہی۔ اس زمانے میں مجھے محسوس ہُوا کہ اسی مسئلے کے بہت سے پہلو اور نہایت اہم پہلو ایسے ہیں جن پر کما حقہ توجہ نہیں کی جا رہی ہے۔ چنانچہ میں نے ۱۹۳۵ء میں حقوق الزوجین کے عنوان سے ایک طویل سلسلہ مضامین ”ترجمان القرآن“ میں لکھا اور اس میں اسلام کے قانونِ ازدواج کی روح اور اس کے اصول کی وضاحت کرنے کے ساتھ اُن احکام کی تشریح کی جو معاملاتِ زن و شوہر کی اصلاح کے لیے بہم کو قرآن و حدیث میں ملتے ہیں اور چند ایسی تجاویز پیش کیں جن سے مسلمانوں کی موجودہ قانونی مشکلات صحیح طریقے سے حل ہو سکتی ہیں۔ یہ سلسلہ اہلِ علم و عمائد کرام کی توجہ منعطف کرانے کے لیے لکھا گیا تھا۔ مگر اس میں بہت سے ایسے مباحث بھی آگئے تھے جن کا مطالعہ عام ناظرین کے لیے بھی مفید ہو سکتا ہے خصوصاً جن لوگوں نے میری کتاب ”پردہ“ ملاحظہ فرمائی ہے وہ خود بخود اس کی ضرورت محسوس کرتے ہوئے کہ تعلقات زن و مرد کو منضبط کرنے کے لیے اسلام نے جو قوانین مقرر کیے ہیں اُن سے واقفیت حاصل کریں۔ تاکہ اس دین کا پورا نظامِ معاشرت ان کی سمجھ میں آسکے۔ اسی ضرورت کو محسوس کرکے اس سلسلے مضامین کو بعض ضروری اضافوں کے ساتھ کتابی صورت میں شائع کیا جا رہا ہے۔

ابو الاعلیٰ

۲۸ صفر ۱۳۶۲ھ (۵ مارچ ۱۹۴۳ء)