آزادی

آزادی کا ایک مفہوم غیروں کی غلامی سے آزاد ہونا ہے۔ آزادی کا ایک اور مفہوم ایک قوم کی حیثیت سے خود اپنے ملک میں آزاد ہونا ہے اور آزادی کا ایک اور مفہوم جو خاص ہمارے لئے ہے وہ ایک مسلمان قوم کی حیثیت سے آزاد ہونا ہے۔

میں چاہتا ہوں کہ آپ اس بات کا جائزہ لیں کہ کیا آپ کو تینوں قسم کی آزادیاں حاصل ہوئی ہیں یا ان میں سے کوئی آزادی حاصل ہوئی ہے اور کوئی نہیں ہوئی۔ بلا شبہ ہم کو یہ آزادی حاصل ہوئی ہے کہ ایک غیر قوم جو ہمارے اوپر مسلط تھی اس کے تسلط کا اللہ تعالیٰ نے خاتمہ فرمایا اور ہمیں اس سے نجات دی ۔ یہ کوئی معمولی چیز نہیں ہے بلکہ اللہ تعالیٰ کا ہم پر بہت بڑا احسان ہے ۔ جس نسل نے تقسیم کے بعد آنکھیں کھولی ہیں یا تقسیم کے بعد ہوش سنبھالا ہے اس کے لئے یہ اندازہ کرنا بھی مشکل ہے کہ اس آزادی سے پہلے غلامی کے دور میں ہماری کیا حالت تھی اور یہ آزادی کتنی بڑی نعمت ہے جو اللہ نے ہم کو عطا فرمائی ہے۔