آزادی

حضرات! اللہ تعالٰی کی نعمتوں میں سے ایک بڑی نعمت آزادی ہے۔ انسان ہی نہیں بلکہ حیوانات تک آزادی کی اہمیت اور قدر و قیمت کو فطری طور پر جانتے ہیں۔ کسی جانور کو آپ پنجرے میں بند کردیں آپ دیکھیں گے کہ وہ پنجرے میں بند ہوتے ہی بے چین ہو جاتا ہے اور بار بار پھڑپھڑاتا اور آزادی حاصل کرنے کی کوشش کرتا ہے اور اگر اتفاق سے اس کے پنجرے کا دروازہ کھل جاتا ہے تو وہ اس سے نکل بھاگنے میں ایک سیکنڈ بھی تامل نہیں کرتا۔ یہ اس بات کی ایک کھلی ہوئی علامت ہے کہ انسان اور حیوان سب کی فطرت قید اور غلامی سے انکار کرتی ہے اور ہر جاندار اس بات کو جانتا ہے کہ آزادی کے بغیر اس کی زندگی بے معنی ہے۔

اس لحاظ سے ہم اس بات پر جتنے بھی خوش ہوں اتنا ہی کم ہے کہ آج ہی کے دن ہمیں اس طویل غلامی سے نجات ملی تھی جو انگریزوں کی آمد کے بعد سے ہم پر مسلط ہوئی تھی۔ لیکن اس خوشی کے ساتھ یہ ضروری ہے کہ ہم پورے غور و فكر کے ساتھ اس بات کا جائزہ لیں کہ خود آزادی کا مفہوم کیا ہے؟ اس کے معنے کیا ہیں؟ کن معنوں میں ہم کو آزادی حاصل ہوئی ہے اور کس لحاظ سے ہم آزادی سے بہرہ ور نہیں ہو سکے ۔