ٹرکی میں عیسائیوں کی حالت

ہر بطریق اپنی قوم کا روحانی سردار ہے اور اپنے مذہبی اختیارات کو بغیر حکومت کی مداخلت کے آزادی کے ساتھ استعمال کرتا ہے ، وہ تمام مذہبی جماعت کا صدر ہوتا ہے اور تمام چھوٹے بڑے پادری اس کے ماتحت ہوتے ہیں ، بطریق کو تمام پادری خود اپنے اندر سے کثرت آرا کے ساتھ منتخب کرتے ہیں اور خود ہی کثرت آرا کے ساتھ اسکو معزول کر سکتے ہیں ، حکومت کو اس کے عزل و نصب کا کوئی اختیار نہیں ، اگر وہ اپنی قوم کے مذہبی قوانین کی خلاف ورزی کرتا ہے تو صرف پادریوں ہی کو حق ہے کہ اسکو برطرف کر دیں، سلطنت ہر حال میں ان کے فیصلہ کو تسلیم کرتی ہے ان وسیع اختیارات سے پادریوں نے بہت بیجا فائدے اٹھائے ہیں اور بڑی بڑی نالائق حرکات کی ہیں، جن پر غیر ملکی قناصل شاہد ہیں [؂ تاریخ دولت عثمانیہ (فرنچ) صفحہ ۴۳۶]، ایڈمنڈ انگلہارٹ لکھتا ہے "باب عالی نے جو رعایات عیسائیوں کو عطا کی ہیں اور خصوصیت کے ساتھ بطریقوں اور پادریوں کو جو وسیع اختیارات دیئے ہیں ان سے اس متعصب طبقہ نے بہت بیجا فائدے اٹھائے ہیں اور ان کا ایسا غلط استعمال کیا ہے کہ وہ غیر مسلم جماعتوں کو فائدہ پہنچانے کی بجائے نقصان پہنچائے گا۔ [ترکی اور تنظیمات صفحہ ۲۳۸]

مجلس مقدس میں ۱۲ پادری ہوتے ہیں جن میں سے ۶ ہر سال منتخب ہوتے ہیں اور یہ جماعت تمام مذہبی نظام کو قائم رکھتی ہے، حکومت کو، جو مسلمانوں کے تمام مذہبی معاملات پر اپنی نگرانی رکھتی ہے چرچ میں دخل دینے کا کوئی حق نہیں، چرچ، ملک کی سیاسی قوت کی دسترس سے آزاد ہے، عیسائیوں کے مذہبی سردار اپنی حدود میں مختار کل ہیں۔ اگر کوئی پادری یا خادم چرچ کے قانون کی خلاف ورزی کرے یا کسی مذہبی گناہ کا ارتکاب کرے تو بطریق اسکو سخت سے سخت سزا دے سکتا ہے اور اسکے لئے کوئی اپیل نہیں۔