اسلام دور جدید کا مذہب

ڈیلی سن: جو لوگ ترک وطن کر کے یہاں برطانیہ آئے ہیں، کیا وہ یہاں کے طرز زندگی، روایات اور اقدار کو اپنا لیں گے؟

سید مودودی: مسلمانوں کو مغربی تہذیب کے مقابلے میں اسلامی روایات اور تہذیب و ثقافت سے کسی قیمت پر بھی دست بردار نہیں ہونا چاہیے۔ یہ آپ کا کام ہے کہ آپ اپنے لوگوں کو اس رواداری اور وسیع الظرفی کی تعلیم دیں کہ وہ نہ صرف یہ کہ بہت سی نسلوں پر مشتمل سوسائٹی کو قبول کریں، بلکہ multicultural society (کثیر قومی معاشرے) کی تشکیل کو بھی تسلیم کریں۔

ڈیلی سن: کیا یہ ممکن ہے؟ مختلف ثقافتوں کی علم بردار قوموں پر مشتمل سوسائٹی تو ایک ناممکن سی بات معلوم ہوتی ہے۔

سید مودودی: بلاشبہ تعصب ماحول پر بُری طرح چھایا ہوا ہے۔ لیکن لوگوں کے لباس وغیرہ تو سطحی چیزیں ہیں، اصل تعصب جس کا تدارک کرنے کی ضرورت ہے وہ اس سطح کے نیچے، خیالات وافکار میں پایا جاتا ہے۔ برطانوی باشندے بھی تو آخر ہمارے ملک میں آ کر رہے تھے، لیکن ہم نے تو انھیں کبھی مقامی معاشرے میں جذب ہو جانے کے لیے نہیں کہا تھا اور نہ ہم نے ان سے کبھی اپنے مقامی لباس پہننے کا مطالبہ کیا تھا۔ موجودہ دَور میں یہ بات کچھ ضروری نہیں رہی ہے کہ لوگ اپنے ملکوں کے اندر ہی محدود رہیں اور اُن سے باہر نہ نکلیں۔

تاہم، جو بات میں یہاں کے مسلمانوں سے کہتا ہوں وہ یہ ہے کہ وہ اس ملک میں اخلاص اور فرض شناسی کے جذبے کے ساتھ کام کریں، لیکن اس کے ساتھ ساتھ اسلام کے مخلص اور سچے پیرو بنیں۔ یہاں کے لوگوں کے سامنے ایک اچھا نمونہ پیش کریں۔ اور یہ بات خاص طور سے سامنے رکھیں کہ وہ یہاں کسی قیمت پر بھی اپنی تہذیبی روایات سے انحراف نہیں کریں گے۔ (Daily Sun، لندن، ۱۲ دسمبر ۱۹۶۸ء)