اخلاقیات اجتماعیہ اور اس کا فلسفہ

ان حقوق کے بعد حق ملکیت کا درجہ ہے۔ اس کو آزادی کا قریب قریب ایک جزو سمجھنا چاہیے۔ ہر مقصد کے لیے اسباب و وسائل ہوتے ہیں جن کے بغیر اس کا حصول ناممکن ہوتا ہے۔ اگر کسی شخص کو ان وسائل کا حق استعمال حاصل نہ ہو تو طلب مقصد کے لیے اس کی آزادی بے معنی ہے۔ وسائل کی مقدار غیر محدود ہے اس لیے اس سوال کا حل کرنا بہت مشکل ہے کہ ان کے استعمال کو جماعت پر کیوں کر تقسیم کیا جائے؟ اگر یہ وسائل صرف چند افراد کے لیے مخصوص کر دیے جائیں تو باقی افراد کا حق مارا جاتا ہے اور اگر سب پر مساوی تقسیم کیے جائیں تو علاوہ ناممکن ہونے کے یہ قانونِ فطرت کے خلاف ہے اور مساوات کسی حال میں قائم نہیں رہ سکتی۔ مگر ہم اس دل چسپ اور مشکل مسئلہ پر ان صفحات میں کوئی بحث نہیں کر سکتے، کیونکہ اس کا تعلق سیاسیاتِ اقتصادیہ سے ہے۔ یہاں صرف حق ملکیت کی اہمیت پر ہی زور دیا جا سکتا ہے، اس حیثیت سے کہ وہ ارتقائے حیات میں معین ہے۔

اس حق کے ساتھ جو فرض عائد ہوتا ہے وہ یہ ہے کہ اس کو عاقلانہ طور پر فلاحِ جماعت کے لیے استعمال کیا جائے۔ ہر چیز جماعت کی ملک ہے اور اس کو جماعت ہی کے فوائد کے لیے ہونا چاہیے۔ انسان تعلیم و تمدن میں جتنی ترقی کرتا جاتا ہے اتنی ہی اس کے اندر اس حق کو استعمال کرنے کی صلاحیت پیدا ہو جاتی ہے، مگر پھر بھی وہ اپنے فرض کو محسوس کرنے میں ایک بڑی حد تک کوتاہی کر رہا ہے۔ خالص اخلاقی نقطۂ نظر سے ہم یہ کہہ سکتے ہیں کہ کوئی شخص سوائے ان چیزوں کے جو اس کے وجود کے لیے لازمی ہیں، اور کسی چیز کا حق نہیں رکھتا۔ جیسا کہ ایک جرمن عالم اخلاقیات کہتا ہے ”کہ میں اس کے سوا اور کسی چیز کا مالک نہیں ہوں جو میں ہوں“، قریب قریب یہی خیال افلاطون نے بھی ظاہر کیا ہے، وہ کہتا ہے کہ ”ایک اعلیٰ نظام اجتماعی میں ہر چیز مشترک ہونی چاہیے، شخصی ملکیت کوئی شے نہیں ہے۔“ مگر عملی سیاست میں اس اصول کا نبھنا بہت مشکل ہے اس لیے ہمیں اس دائرہ کو محدود کرنا پڑے گا اور صفائی کے ساتھ یہ حد بندی کرنی پڑے گی کہ ہر شخص اپنی ملکیت میں تصرف کا مختار ہے، مگر اس کا فرض ہے کہ اپنی جائز و مناسب ضروریات زندگی کو پورا کرنے کے بعد اس کے بقیہ فوائد کو جماعت پر خرچ کرے۔ ارسطو نے اس بارے میں یہی مذہب اختیار کیا ہے۔ چنانچہ وہ کہتا ہے کہ:

”اعلیٰ نظام حکومت میں ہر شخص کو اپنی ملکیت میں تصرف کا پورا پورا حق حاصل ہے لیکن اس حق کے ساتھ جماعت کی طرف سے اس پر یہ فرض بھی عائد ہوتا ہے اور اس پر وہ اخلاقاً مجبور بھی ہے، کہ اس میں سے صرف بقدر ضرورت خرچ کرے اور جو کچھ باقی رہے اسے جماعت کی صلاح و فلاح کے کاموں میں لگائے۔“

اگرچہ ایسی ملکیتوں میں جیسے زراعت ہے، یہ اصول بھی پیچیدہ ہو جاتا ہے مگر ایک بڑی حد تک قابل عمل ہے۔