اخلاقیات اجتماعیہ اور اس کا فلسفہ

حق زندگی کے بعد دوسرا درجہ حقِ آزادی کا ہے۔ چونکہ ہر شخص کو جماعتی زندگی میں اپنا نصب العین تلاش کرنے اور اس کے حصول کی سعی کرنے کے لیے آزادی کی ضرورت ہے، اس کے بغیر وہ اپنی استعداد کے مطابق تکمیلِ نفس کی امکانی سعی نہیں کر سکتا، اس لیے آزادی یا حریتِ فکر و عمل ہر شخص کا حق ہے‘ حق زندگی کے ساتھ اس کا گہرا تعلق ہے اس کے بغیر حق زندگی ایک قالب بے روح کی حیثیت رکھتا ہے اور اخلاق اس کو لوازم حیات انسانی میں سب سے اہم درجہ دیتا ہے، کوئی شخص نہ کسی شرط پر اس حق کو بیچنے کا مجاز ہے اور نہ کسی کو اس کے خریدنے کا حق ہے۔[ هيگل نے فلسفۂ تاریخ کے مقدمہ میں یہ ثابت کرنے کی کوشش کی ہے دنیا میں حقِ آزادی کے احترام کا اس وقت جو کچھ بھی احساس ہے اور خصوصاً عہدِ اصلاح کے بعد سے اس بارہ میں جس قدر آہنگی سے کام لیا جارہا ہے، وہ سب عیسائی تعلیمات کا نتیجہ ہے لیکن اگر اصولِ ولیم سے قطع نظر کر کے، صرف عملی نتائج کو دیکھا جائے تو ہم دیکھتے ہیں کہ عیسائیت اپنی دو ہزار برس کی زندگی میں ایک دن بھی اس حق کو محفوظ کرانے میں کامیاب نہیں ہوئی اور اس کا دامن شخصی آزادی کے خون سے اب تک تر ہے۔ بر خلاف اس کے اسلام نے دُنیا میں اس حق کے احترام کو قائم کیا، اس نے انسانی امتیازات کو مٹا دیا، ایک انسان پر دوسرے انسان کی حکومت کے طریقہ کی اصولاً و عملاً انتہائی مخالفت کی، اور آج دُنیا نے مغرب میں غلامی کے خلاف جو کچھ بھی چیخ و پکار ہے، وہ اس آواز کی صدائے بازگشت ہے جو عرب کے ریگستان سے اٹھی تھی، اس کا عنوان چاہے یورپ نہ کرے، مگر حقائق کی دُنیا میں یہ ایک مسلمہ واقعہ ہے۔ یہاں تفصیل کی گنجائش نہیں، صرف اتنے ہی اشارہ پر قناعت کی جاتی ہے۔]

یہی حق اجتماعی حیثیت بھی رکھتا ہے، جس طرح ہر فرد کو یہ حق حاصل ہے کہ نظام جماعت کے اندر اپنے نصب العین کو تلاش کرنے کے لیے جو راہ چاہے آزادی کے ساتھ اختیار کرے، اسی طرح ہر جماعت کو بھی یہ حق حاصل ہے کہ اپنے ارتقائے ذہنی وعملی کی تکمیل اور اپنے نصب العین کے حصول کے لیے تمام ممکن ذرائع کو استعمال کرنے میں آزاد ہو اور کوئی قوت اُس کو روکنے والی نہ ہو۔ علم الاخلاق انفرادی آزادی سے زیادہ اجتماعی آزادی کا احترام کرتا ہے، کیونکہ اجتماعی آزادی خود انفرادی آزادی کی اصل ہے اور اگر وہ مفقود ہو تو افراد کی آزادی بھی بے معنی ہو جاتی ہے۔

مگر آزادی کبھی بے تعلقی اور عدم ارتباط کے معنی میں نہیں بولی جاتی۔ اس کے معنی یہ نہیں ہیں کہ ہر فرد جماعت کے نظام سے اور ہر جماعت بین الاقوامی نظام سے اپنے آپ کو قطعاً آزاد سمجھے اور دنیا کے تمدن نظام کو جو علائق و روابط پر مبنی ہے، منتشر کرنے کی کوشش کرے۔ اگر آزادی کے یہی معنی ہوں تو سارا نظام عالم درہم و برہم ہو جائے ۔ اسی لیے علم الاخلاق ہر آزادی خواہ کو متنبہ کرتا ہے کہ وہ خالص مطلق العنانی کو حاصل کرنے کی کوشش نہ کرے ورنہ وہ اپنے اصلی حق کو بھی کھو دے گا، وہ حق آزادی کے معنی یہ قرار دیتا ہے کہ ہر شخص نظام جماعت کو قائم رکھتے ہوئے بغیر دوسروں کی آزادی میں خلل ڈالے ہوئے جہاں تک ممکن ہو اپنے شخصی اعمال اور اپنی زندگی کے اختیاری معاملات میں آزاد رہے اور اس سے فائدہ اُٹھائے ۔ اسی طرح اجتماعی آزادی کو بھی وہ دوسری جماعتوں کی آزادی اور بین الجماعتی تعلقات کی حرمت سے مشروط قرار دیتا ہے۔ دوسرے الفاظ میں انفرادی آزادی کے لیے جماعتی نظام کی پابندی شرط ہے ، اور اجتماعی آزادی کے لیے بین الاقوامی حقوق کی حرمت لازم ۔ یہ وہ فرض ہے جو حق آزادی کے ساتھ ہر فرد اور ہر جماعت پر عائد ہوتا ہے۔