اخلاقیات اجتماعیہ اور اس کا فلسفہ

اب ہمارے سامنے یہ مسئلہ آتا ہے کہ وہ کونسی عادلانہ تنظیم ہے جو جماعت میں نظام عدل کو قائم رکھ سکتی ہے؟ یہ ایک نہایت پیچیدہ بحث ہے اور ہم اس جگہ اپنے فرض کو ادا کرنے کے لیے مجبور ہیں کہ تفصیلات اور فروعی بحثوں سے قطع نظر کر کے صرف اصول پر قناعت کریں۔ ان مباحث پر جتنی صاف اور واضح بحث ارسطو و افلاطون نے کی ہے، کسی اور نے نہیں کی۔ یہ دونوں جمہوریت اور اخلاق میں جو کچھ لکھ چکے ہیں وہ اساس و بنیاد کی حیثیت رکھتا ہے اور زمانہ حال کے مصنفین، مل، گرج وٹ، اسٹیفن وغیرہ نے جو کچھ لکھا ہے، وہ سب اسی کی تجدید، تفصیل اور تفریح ہے۔ یہ بات ہر شخص جانتا ہے کہ احوال حیات میں برابر تغیر ہوتا رہتا ہے، جو قانون ایک حالت میں مفید ہوتے ہیں، دوسری حالت میں مضر ہو جاتے ہیں۔ اسی لیے علمائے اخلاقیات کی رائے ہے کہ زندگی کے بہت سے شعبوں میں سخت و قطعی قوانین کے بجائے علم و عمل کے فضائل حسنہ کو ترقی دینی چاہیے۔ ڈاکٹر اسپنسر نے اپنی مشہور کتاب The man versus state میں اس پر خوب بحث کی ہے۔ مگر ڈاکٹر بسکنٹ کی تصریحات و توضیحات سب سے زیادہ قابل قدر ہیں جو اس نے Aspects of the Social problem میں کی ہیں۔ اس کا قطعی فیصلہ ہے کہ قوانین حکومت مطلق العنان اور خود سر قوموں کی طرح امن پسند اور عاقل قوموں کے لیے بھی بے کار ہیں، اس لیے قانونی جبرو اکراہ سے زیادہ مؤثر چیز سوشل قوانین ورسوم ہیں جو ہر لمحہ سوسائٹی کے ہر فرد کو متاثر کرتے ہیں۔ تاہم قانون کے لیے ایک وسیع دائرہ باقی ہے، کیونکہ جماعتوں کی ترقی اور رائے عامہ کی عقلیت ہمیشہ بطی السیر ہوتی ہے، اور ہر زمانہ میں ایسے لوگوں کی ایک کافی تعداد موجود رہتی ہے جن پر بغیر سزا اور قانونی دباؤ کے اثر نہیں ہوتا، اس کے علاوہ تعزیری قوانین کی ضرورت اکثر جاہل اور وحشی قوموں کے لیے ہوتی ہے، یا ان جماعتوں کے لیے جن پر دوسری جماعت کی حکومت ہو۔ پس اصول کہتا ہے کہ ایسی جماعتوں کے لیے جن کی اپنی حکومت ہو اور جن کا نظام اخلاق وحشت کے درجہ سے نکل گیا ہو تعزیری قوانین کی ضرورت نہیں، ان میں صرف ایسے قوانین ہونے چاہئیں جو محبت و الفت، اور اخوت و برادری کے رشتوں کو زیادہ مضبوط کرنے والے ہوں، اور اگر کچھ تحریری قوانین کسی ضرورت سے نافذ بھی کیے جائیں تو اس شرط کے ساتھ کہ ان کا مقصد پورا ہوتے ہی انہیں منسوخ کر دیا جائے ۔

مگر افسوس ہے کہ ایسا نہیں کیا جاتا، دنیا جس قدر آگے بڑھتی جاتی ہے اسی قدر ہر ملک میں قوانین کی تعداد بھی بڑھتی جارہی ہے۔ سینٹ پال نے یہودیوں کے مذہبی قانون کی نسبت کیسی پیاری بات کہی ہے کہ ” وہ صبح تک پہنچانے کے لیے صرف ایک راہنما تھا؛ یعنی جب جماعت نے اخلاقی نصب العین کے معنوں کو سمجھ لیا، تو پھر قانونی دباؤ کی ضرورت نہیں رہی، بلکہ ان کا بدل دینا ضروری ہو گیا ۔ قریب قریب یہی حال اور سب قانونوں کا ہے، کہ جب جماعت حقیقی آزادی کو پا لیتی ہے تو یہ بالکل بے معنی ہو جاتے ہیں۔ صرف ابتدأ ناروا آزادی کی روک تھام کے لیے ان کا وجود ضروری ہوا کرتا ہے۔

یہ ایک عام بات ہے کہ لوگ اوّل اوّل جو باتیں خون سے کرتے ہیں، وہ رفتہ رفتہ عادت بن جاتی ہیں، اور پھر وہ اضطراراً کرنے لگتے ہیں کسی نے خوب کہا ہے کہ ”پہلے قانون وجود میں آتا ہے، پھر عادت بن جاتا ہے، پھر نیکی“