اخلاقیات اجتماعیہ اور اس کا فلسفہ

اس سلسلہ میں تمہیدی مباحث ختم کرنے سے پہلے ہمیں بھی ضرور دیکھنا چاہیے کہ اس اجتماعی نظریہ کا عملی ظہور دنیا نے واقعیت میں کس حد تک نظر آتا ہے۔ ہم دیکھتے ہیں کہ سوائے مخبوط الحواس آدمیوں کے باقی ہر شخص کی زندگی ایک اجتماعی شیرازہ میں بندھی ہوئی ہے۔ اس کے تمام افعال و اعمال ایک مرتب نظام جمعیت کے ماتحت واقع ہوئے ہیں اور وہ یوم پیدائش سے لے کر لمحۂ وفات تک اسی نظم و نسق اور اسی پابندی میں زندگی بسر کرتا ہے۔ یہ نظام ہر شخص کو ایک سلسلہ میں باندھے ہوئے، ہر ذی عقل ہستی کا مطمح نظر اسی نظام میں پوشیدہ ہے اور اس کو اخلاقیات کی اصطلاح میں نظام اجتماعی کے نام سے موسوم کرتے ہیں۔ اس کی بندشیں اتنی قوی اور عالمگیر ہیں کہ کوئی شخص اصلی معنوں میں آزادی کا دعویٰ نہیں کرسکتا۔ وحشی سے وحشی افراد بھی اجتماعی اصول کے دائرہ سے باہر نہیں جس قوم، نسل یا جماعت سے ان کا تعلق ہے اس کے رسوم و عادات کی بندشوں میں وہ ضرور جکڑے ہوئے ہیں، یہی اخلاقی فضا جس میں وہ رہتے ہیں ان کی خواہشوں کی اصل دنیا ہوتے ہیں اور سوائے اس صورت کے کہ ان کے دماغ میں کوئی فتور واقع ہو جائے اور کسی حالت میں وہ اس نسل یا جماعت سے اپنے تئیں الگ نہیں کر سکتے۔ نہ اس کے مقابلہ میں اپنی ذات کو کوئی مستقل بالذات ہستی تصور کر سکتے ہیں اور نہ اپنے اخلاق و عادات اس قوم کے اجتماعی اخلاق و عادات سے مختلف اختیار کر سکتے ہیں۔

یہ ایک ایسی روشن حقیقت ہے کہ ہرمِل جیسا انفرادیت پسند بھی اس کو نہ صرف تسلیم کرتا بلکہ اس پر زور دیتا ہے، وہ کہتا ہے کہ ”اجتماعیت اس قدر لازمی اور فطری شئے ہے کہ بعض غیر معمولی حالات، یا عہدِ اَرہب ہو جانے کے سوا، انسان جماعت سے اپنی ذات کے بالکل جدا ہو جانے کا خیال بھی نہیں کرسکتا۔ نوع انسان عہد وحشت کی حیوانی زندگی سے جتنی دُور ہوتی جاتی ہے، اتنا ہی یہ رشتہ مضبوط ہوتا جاتا ہے۔ یہی وجہ ہے کہ انسانیت روز بروز اجتماعیت کی زیادہ محتاج و طلب گار ہوتی جاتی ہے۔ اس کے لیے جو چیز جتنی زیادہ ضروری ہے، فطرت انسانی اس کو حاصل کرنے کی اتنی ہی زیادہ کوشش کرتی ہے۔ اور افراد کے دماغوں میں یہ بات جاگزیں ہوتی جاتی ہے کہ وہ جماعت کا ایک لاینفک جز ہے۔

مِل کا یہ عقیدہ کامٹ سے ماخوذ ہے، مگر وہ اپنے فلسفہ سے اس عقیدہ کو اچھی طرح مطابق نہیں کر سکا جس کی وجہ سے اس مسئلہ کے اکثر گوشہ ہائے بحث و نظر بالکل تشنہ رہ گئے ہیں۔ تاہم ان خیالات کے لیے اس کی کتاب ”افادیت“ کا مطالعہ مفید ہوگا۔